Ish-prefekti i Fierit, Bujar Hasa kërkon lirimin nga burgu, pasi i cilëson si të pabaza akuzat e prokurorisë për mashtrim. Avokati i tij, Isuf Shehu deklaroi sot se personi që e ka paditur ish-Prefektin i ka të pabaza pretendimet e pronësisë. Hasa u arrestua për mashtrim me kontratat e shitblerjes së apartamenteve dhe një dyqani të një personi me shtetësi kanadeze.

Hasa akuzohet se së bashku me një tjetër person me inicialet P.P. kanë mashtruar 2 persona, një shtetas shqiptaro-kanadez dhe një shqiptar nga Laçi duke u marrë mbi 300 mijë euro (260 mijë dollarë dhe 50 mijë euro). Ish-Prefekti Hasa sipas policisë i ka shitur një kanadezi me inicialet B.H. një dyqan në Tiranë, por me dokumente false, ndërkohë që i mori 260 mijë dollarë.

Sipas burimeve të prokurorisë shtetasit shqiptaro-kanadez, Hasa i ka shitur dhe tre apartamente të tjerë, ku njërin prej tyre ja ka marrë me dokumente false dhe më pas e ka vendosur kolateral në një bankë të nivelit të dytë, në të cilën kishte marrë kredi. Po ashtu edhe shqiptarit me inicialet D.M.,i shiti një apartamentet me dokumente false duke e mashtruar, pasi të njëjtin apartament e kishte shitur dhe njëherë tjetër.

Hetimet kanë nisur 8 muaj më parë pas denoncimit të dy personave, ndërsa vijojnë për të mësuar nëse ka persona të tjerë të mashtruar nga ish-Prefekti. Bujar Hasa ka qenë Prefekt i qarkut të Fierit në vitin 2009-2011 nga radhët e LSI, ndërsa në 2013 kandidoi për deputet për PDK.

Bujar Hasaj
Bujar Hasaj

d.b/shqiptarja.com