'Investimet e huaja' Basha:E vështirë
për ambasadorët, faji i Edi Ramës

Kryetari i Partisë Demokratike, Lulëzim Basha pas reagimit të deputetes Jorinda Tabaku, ka reaguar edhe ai duke bërë një status në “Facebook”, ku shkruan se është mision i pamundur që ambasadorët të sjellin investime të huaja në Shqipëri.

Pas konferencës për Diplomacinë Ekonomike ku morën pjesë ambasadorët shqiptarë, ministri Ditmir Bushati dhe kryeministri Edi Rama. I menjëhershëm ka qenë reagimi i deputetëve të PD përfshirë kryetarin e saj Lulëzim Basha.

Basha akuzon Ramën si përgjegjës për mungesën e investimeve të huaja. Basha shpjegon se klima për bizneset e huaja është përkeqësuar në këto katër vitet e fundit, për shkak të korrupsionit, rritjes së taksave.

Statusi i plotë:

Rama e di shumë mirë këtë, sepse është ai përgjegjësi për krijimin e një klime armiqësore për biznesin vendas dhe të huaj.

Kryeministri i pashpresë dhe i korruptuar deri në rrënjë, e di se në Shqipëri mund të investojnë apo marrin tendera vetëm ata që pranojnë të dorëzojnë kapar 30- 50% të fitimit tek ai, përmes sejmenëve të tij të kapur në përgjime.

Ambasadorët e kanë mision të pamundur sjelljen e investitorëve të huaj, sepse në 4 vitet e fundit raportet ndërkombëtare flasin vetëm për përkeqësimin e klimës së biznesit, për rritjen e taksave, për korrupsionin e përhapur në çdo nivel të qeverisjes.

Sepse tenderat dhe koncesionet përfundojnë në xhepat e 10 klientëve të kryeministrit dhe investitorët e huaj gjymtohen nga kriminelët e lidhur me Ramën dhe Dakot e tij për t’u përzënë nga Shqipëria.

Gjatë qeverisjes tashmë të vdekur të Ramës, në Shqipëri nuk erdhi asnjë investim serioz i huaj. Po të mos ishin dy projektet e mëdha energjetike, gazsjellësi Trans Adriatik dhe Kaskada e Devollit, niveli i investimeve do të ishte në minimum historik, duke e kthyer vendin 15 vite prapa.

Ambasadorët e Shqipërisë e kanë mision të pamundur sjelljen e investitorëve të huaj, sepse për shkak të keqqeverisjes së Ramës vendi është në depresion ekonomik dhe social. Rreth 300 mijë shqiptarë të larguar në 4 vjet nga Shqipëria janë prova ulëritëse e këtij realiteti dëshpërues.

Investitorët e huaj do të vijnë në Shqipëri, kur vendi të ketë një qeveri që lufton krimin, hap vende pune dhe ju jep mundësi të gjithëve.

Por kjo nuk do të ndodhë përsa kohë vendin ta drejtojë kryeministri i kapur nga krimi dhe i zhytur në krim, që ktheu Shqipërinë në hambar droge dhe buxhetin e shqiptarëve në lavatriçe për Pastrimin e Parave të Pista.

Redaksia Online
Xh.F/Shqiptarja.com