'Kryeprokurori', Petrit Vasili:
Kështu e nisi edhe Hitleri...

Kreu i grupit parlamentar të LSI, Petrit Vasili e cilëson puç Kushtetues procedurën e ndjekur nga Kuvendi për zgjedhjen e Kryeprokurorit të ri. I ftuar në 45 minuta nga Denis Minga në Report Tv, Vasili tha se maxhoranca po kryen "grusht shteti" pa armë ndaj institucioneve dhe shtetit, të njëjtën rrugë, që siç tha ai, e ndoqi edhe Hitleri. "Jemi përpara një grushti shteti pa armë. Edhe Hitleri pa armë e rrëmbeu Parlamentin, shtetin, pastaj rrëmbeu armët", tha Vasili.

Ai shtoi se autorët e këtij puçi do cilësohen puçistë dhe do akuzohen për tradhti kombëtare nëse zgjedhin Kryeprokurorin sipas procedurës së nisur nga Kuvendi. Sipas tij, Kushtetuta nuk parashikon zgjedhjen e një Kryeprokurori të Përkohshëm. "Është puç kushtetues. Procedura e ndjekur nga komisioni i ligjeve, dëgjesat e zhvilluara janë të paligjshme. S'ka asnjë nen kushtetues që të parashikojë këtë gjë. Nëse do vazhdojnë është dita e fundit kur në Shqipëri flitet për shtet ligjor. 60% e Kushtetutës ndryshoi në vitin 2016. Është një kushtetutë e mbështetur nga SHBA dhe BE të cilët e thanë haptaz konsiderojeni si kushtetutën tonë dhe kjo kushgtetutë dhunohet ditën për diell. Reagimi do jetë shumë i fortë. Ky prokuror do refuzohet të njihet nga ne dhe të gjithë shqiptarët. Ata që do ta konsiderojnë këtë do jenë puçistë të cilët do akuzohen për tradhti kombëtare. Çfarë do i mbrojë ligjit ky Kryeprokuror i cili ka ardhur në detyrë në shkelje me ligjin", tha Vasili.  

"Shefi i EURALIUS u shkarkua për inkompetencë"
Vasili vuri në pikëpyetje edhe ekspertizën e EURALIUS dhe OPDAT, pasi theksoi se shefi i këtij misioni në Tiranë u shkarkua për mungesë kompetence. "Rene Deville u shkarkua për inkompetencë. Isha ministër Drejtësie kur ai u shkarkua nga detyra", tha Vasili, ndërsa duke komentuar deklaratat e ambasadorëve Lu e Vlahutin tha se "përgjegjëse për këtë çështje janë institucionet shqiptare". "Nuk e përcaktojnë ambasadorët, por e parashikon Kushtetuta shqiptare". 

"Mandatin e Llallës e konstaton KLP"
Mbarimin e mandatit të Llallës, shtoi Vasili, e konstaton KLP dhe jo Kuvendi. Ai u shpreh në një mendje me kryetarin e PD, Lulzim Basha që Llalla të vijojë të qëndrojë në detyrë deri në krijimin e KLP-së. "Kush e shpall vakancën? Ulsi Manja? Ku shkruhet sa është mandati? Ishte menduar që gjallë a vdekur kjo punë do ndodhte në kohë, pra që do ishte ngritur KLP dhe nuk mendohej se Shoqëria Civile do bllokonte KLP-në, se ata e kanë bllokuar dhe KLP do ngrihej e do merrte vendimet e veta. Ku është shkruar në Kushtetutë që për mosmarrëveshje palët shkojnë në Gjykatën Kushtetuese?", shtoi Vasili.

'Bashkëpunimi me PD, parimor'
Në "45 minuta", Petrit Vasili foli edhe për marrëdhëniet e PD me LSI-në. Ai saktësoi se LSI ka vendosur të bashkëpunojë me demokratët për çështje parimore për ligjshmërinë dhe kushtetutshmërinë. "Bashkëpunimi është parimor. Jemi në një qëndrim për çështjen e Kryeprokurorit dhe për çdo çështje që ka të bëjë me ligjshmërinë dhe kushtetutshmërinë e vendit", theksoi Vasili. 

Petrit Vasili foli edhe për vizitën në SHBA të një grupi deputetësh të LSI të kryesuar nga kryetarja Monika Kryemadhi. Ai tha se janë zhvilluar takime edhe me përfaqësues të DEA-s ku është biseduar për çështjen e drogës në Shqipëri. 

Redaksia Online
l.q/Shqiptarja.com