'Media', Peza apel PD: Ejani të
zhbllokojmë ngërçin në AMA e RTSH

TIRANË - Komisioni i Medias ka nisur sot mbledhjen me një apel drejtuar opozitës. Nënkryetari i komisionit Alfred Peza ka kërkuar nga antarët e djathtë të ketij komisioni që të ndërpresin bojkotin e të bëhen pjesë e punimeve për të zhbllokuar ngërçin e krijuar në Autoritetin e Medias Audiovizive për shkak të vakancave që ka ky institucion si dhe per zgjedhjen e antarve të Këshillit drejtues të RTSH.

"Çështja e zgjidhjes së krizës në Radio Televizionin Publik Shqiptar dhe në AMA është sot çështja më emergjente që kap elementin shqiptar. Ligji aktual përcakton të njëjtat përgjegjësi si për mazhorancën ashtu dhe për opozitën ndaj përfitoj nga ky moment për ti bërë thirrje opozitës që të vijë urgjentisht në komision për të zhbllokuar një minutë e mëpërpara këtë situatë." tha Peza

Por nga ana tjetër deputeti demokrat Luçiano Boçi në një intervistë për A1 Report është shprehur se opozita është e gatshme të bashkëpunojë jo vetëm për këtë çështje por edhe për të tjera por vetëm nëse mazhoranca respekton propozimet që Partia Demokratike i ka bërë asaj. 

"Ne jemi pjesë e grupit parlamentar të PD dhe sigurisht jemi pjesë e vendimmarrjes politike të këtij grupi, jemi në zbatim të bojkotit dhe bojkoti ynë nuk është bojkot i bërë me dëshirën tonë por është i detyruar posaçërisht nga sjellja arrogante e mazhorancës, nqs kjo mazhorancë reagon pozitivisht, tregon vullnet që ajo është e gatshme të zbatojë vendimet e gjykatës Kushtetuese, është e gatshme të mos shkelë më kushtetutën dhe nuk kemi më arsyet të qëndrojmë as jashtë komisioneve as jashtë parlamentit." u shpreh Boçi për A1 Report


(Në foto: Deputeti i PD Luçiano Boçi gjatë intervistës për A1 Report)

Por për zgjedhjen e antarve të AMA-S si edhe për ata të Këshillit të RTSH nevojitet konsensus i të dyja palëve, e nëse opozita nuk pranon të bëhet pjesë e procesit kjo mund të detyrojë mazhorancën të shohë alternativa të tjera duke ndërhyrë ndoshta edhe në ligj , per te të zhbllokuar situatën që ka përfshirë AMA-n dhe RTSH. Por për opozitën kjo do të sillte thellim të distancave mes opozitës dhe mazhorancës. 

"Do shtonte vendosshmërinë tonë për të vazhduar bojkotin." përfunoi Boçi


(Në foto: Deputeti i PD Luçiano Boçi gjatë intervistës për A1 Report)
 
Redaksia Online
(a.h/e.c/shqiptarja.com)