Partia Demokratike do t’i drejtohet sot Kuvendit, ku do të depozitojë një kërkesë për hetimin e ish-ministrit të Brendshëm, Saimir Tahiri, si dhe për drogën. Lajmi është bërë i ditur nga kreu i PD, Lulzim Basha, i cili tha në fund të mbledhjes së grupit parlamentar, se kjo kërkesë ka marrë mbështetjen edhe të partive të tjera opozitare parlamentare.

Sipas tij, komisioni që do të ngrihet do të hetojë dhe ekzekutivin, duke shtuar se ky i fundit ka pasur dijeni për përfshirjen e kupolës së shtetit dhe policisë

“Grupi i PD ka marrë të depozitojmë sot në Kuvend kërkesën për ngritjen e një komisioni hetimor për ish-ministri Tahiri dhe drogën. Kërkesa ka marrë mbështetjen edhe të partive të tjera opozitare. Ministria e Brendshme, Rama e të gjithë hallkat e tjera ishin në dispozicion të informacion se droga bëhej nga përfshirja e kupolës së shtetit dhe policisë.

Rama, Tahiri e Çako e kanë pasur mbi tavolinë këtë informacion nga SHISH, denoncimet e opozitës, nga media, nga shërbimet e huaja inteligjente se Shqipëria ishte mbytur në drogë. Por, Rama i ka varrosur këto fakte në Ministrinë e Brendshme dhe kasafortën e kryeministrisë, sepse droga është bërë me mbrojtjen e tyre dhe nën bekimin e tyre. Për këtë Rama ka shkelur rregulloren e Parlamentit, duke e kthyer atë në gjykatë për të mbrojtur Tahirin. Ndërhyrja e ekzekutivit do të jetë pjesë e këtij hetimi parlamentar”, deklaroi kreu demokrat, Lulzim Basha. 

Ndërkohë, nga selia blu u bë e ditur pak më parë se komisioni hetimor “Tahiri” do të ketë si objekt disa çështje, por më kryesoret, sipas PD, janë “Verifikimi i ligjshmërisë dhe efekteve të vendimit të Kuvendit për të mos lejuar arrestimin e Tahirit. Veprimet e kryeministrit dhe anëtarëve të tjerë të qeverisë në pengimin apo intimidimin e prokurorisë për të hetuar Tahirin në mënyrë të pavarur.

Ligjshmëria e ekstradimit të Nezar Seitit si person nën hetim për të njëjtën çështje si Tahiri dhe efektet që sjell ekstradimi i tij për ish-ministrin e Brendshëm” thuhet në njoftimin e PD për mediat.  Saimir Tahiri është i akuzuar nga prokuroria në dosjen Habilaj, ndërsa ekstradimi i Nazer Seitit drejt Italisë ka sjellë reagimin e ashpër të PD.

d.b/shqiptarja.com