80-vjetori, burokracia shqiptare 
harron shkrimtarin Ismail Kadare

TIRANE- Kadare mbush 80 vjeç. Kadare s'mbush 80 vjeç. Kjo vlen më tepër për burokracinë shqiptare që ende shkruan në deftere bakalli dhe kompjuterin e përdor për të parë video porno. Kadare është atje. Këtu. S'ka rëndësi se ku është, se pothuajse të gjithë po ndjekin telenovelat turke dhe telebingon e Gjebresë. Po ai s'është. S'ka si të jetë i pranishëm në një vend që s'e do të tillë.

Ditëlindjet e Kadaresë janë si përmbytjet në kohë me mot të lig, patriotët e mi s'kanë më kostume kombëtare, plis dhe flamur, po me kohë kanë veshur pelerinën e stuhisë dhe ç'janë të asaj kohe, ç'kanë pirë ujë Selite dhe kanë ngrënë bukë të bardhë, ç'kanë marrë dekorata për merita nga Blloku famëkeq, janë të shenjuar si pemët që druvarët iu kanë vënë damkën e vdekjes.