​Raketa balistike,MPJ thirrje Koresë
së Veriut: Ndaloni provokimet

Koreja e Veriut ka alarmuar sërish botën, teksa ka kryer testin e radhës, duke lëshuar një tjetër raketë balistike. Në lidhje me ngjarjen ka reaguar dhe Ministria e Punëve të Jashtme e Shqipërisë.

Në një deklaratë për media, MPJ dënon ashpër lëshimin e raketës balistike me rreze të mesme të kryer nga Koreja e Veriut, duke e cilësuar atë një shkelje të hapur dhe të përsëritur të të drejtës ndërkombëtare dhe të rezolutës së Këshillit të Sigurimit të OKB-së. 

Më tej, Ministria i bën thirrje Koresë të ndalojë menjëherë provokimet dhe të kthehet në tryezën e bisedimeve si rruga e vetme për një zgjidhje paqësore dhe të qëndrueshme në gadishullin korean. 

"Ministria për Evropën dhe Punët e Jashtme e Republikës së Shqipërisë dënon në termat më të ashpër lëshimin e një rakete balistike me rreze të mesme të kryer sot nga Republika Popullore Demokratike e Koresë. Kjo shkelje e hapur, e përsëritur, e të drejtës ndërkombëtare dhe e rezolutave të Këshillit të Sigurimit të OKB-së tregon se regjimi koreanoverior është i vendosur të vazhdojë të sfidojë komunitetin ndërkombëtar duke përshkallëzuar më tej tensionin në rajon dhe kërcënuar në mënyrë serioze sigurinë globale. Qeveria shqiptare i bën thirrje RDPK të ndalojë menjëherë provokimet dhe të kthehet në tryezën e bisedimeve si rruga e vetme për një zgjidhje paqësore dhe të qëndrueshme në gadishullin Korean".

Redaksia Online
D.Ç./Shqiptarja.com