​SHBA,Trump: Nuk ka lehtësim të
sanksioneve ndaj Rusisë

Presidenti i Shteteve të Bashkuara, Donald Trump, ka deklaruar gjatë ditës së sotme me anë të një statusi në rrjetin social Twitter, se deri në arritjen e një zgjidhjeje për situatën në Siri dhe Ukrainë, nuk do të ketë asnjë lehtësim të sanksioneve amerikane ndaj Rusisë.
 
“Sanksionet nuk ishin temë bisede në takimin tim me president Putin. Asgjë nuk do të ndryshojë deri në arritjen e një zgjidhjeje për Sirinë dhe Ukrainën”, shkruan Trump në Twitter.
 
Rusia, e cila në luftën civile në Siri ka mbështetur presidentin sirian, Bashar al-Assad, ka rënë dakord me SHBA-në ditën e premte në Aman për vendosjen e një armëpushimi në Siri.
 
Sipas asaj që raporton Observatori sirian për të drejtat e Njeriut, armëpushimi ka hyrë në fuqi gjatë ditës së sotme në tre provinca në jug të vendit.
 
Ndërkohë për sa i përket çështjes së Ukrainës, SHBA-të e akuzojnë Rusinë për mbështetje të rebelëve separatist në lindje të Ukrainës, e cila vazhdon të jetë ende në luftë.


(Statusi i Trump në Twitter)
 
Redaksia Online
(D.T/Shqiptarja.com)