Buzëderri, atentat në Skelë

VLORE(24/6/2000) Skela përgjaket sërish. Qëllon me një breshëri kallashnikovi drejt "kundërshtarit" të tij për një "sherr të vjetër", por vret një kalimtar të rastit dhe plagos dy të tjerë. Menjëherë në vendngjarje kanë mbërritur forcat e policisë, të cilat në bashkëpunim me forcat e FNSH-së së Vlorës, pas tri orësh kanë bërë ndalimin e autorit të vrasjes. Ngjarja ka ndodhur dje në orën 11.00, në zonën e Skelës, në Vlorë, dhe autor i vrasjes është një i ri, që policia e përcakton si pjesmarrës në ish-bandën e Gaxhait. Sokol Sinomati, 27 vjeç, i njohur në qytetin bregdetar me pseudonimin "Buzëderri" dhe i deklaruar që në vitin 1997 si pjestar i bandës së Gazment Brrakës, pasi ka zbritur nga makina e tij tip "Benz", ka qëlluar me breshëri automatiku ndaj shtetasit Sokol Nuho, 29 vjeç. "Shënjestra" e tij, ndërkohë ishte ulur në lokalin "London". Burime nga policia e Vlorës, kanë konfirmuar për Gazeta Shqiptare, se edhe ky i fundit ka reaguar menjëherë me pistoletë, por dy protagonistët kanë shpëtuar pa dëmtime. Dhe, sipas të njëjtit burim, për fatin e keq, rreth 150 metra më tutje, tek posta e Skelës, një plumb kallashnikovi ka zënë një kalimtar të rastit, i cili kalonte hypur në një biçikletë. Luigj Xhafa, 42 vjeç, po nga Vlora, ka gjetur vdekjen, i goditur nga një plumb në anën e djathtë të krahërorit. Ndërsa, sipas dëshmitarëve okularë, kanë mbetur të plagosur dhe një burrë e një grua, gjithashtu kalimtarë të rastit. Por, plagosjen e dy personave nuk e konfirmon spitali i Vlorës. Mjekët pohojnë se në spital nuk është paraqitur askush për të kërkuar ndihmë. Vetëm dhjetë minuta më pas, në vendngjarje kanë shkuar forcat e policisë së Vlorës. Sipas dëshmive të para që u mblodhën në vendngjarje, rezultonte se "Buzë-derri" ishte larguar në drejtim të Radhimës, ku dhe u strehua në një nga vilat e plazhit. Ai rrethohet nga forca të shumta të policisë dhe të FNSH-së. Për tre orë me rradhë, "Buzëderri" nuk ka pranuar të dorëzohet, duke kërcënuar se do të hapë zjarr. Por kur kuptoi se nuk kishte asnjë shpresë për t'u larguar, ka vendosur të dorëzohet. Në seancën e parë të pyetjeve, siç konfirmon një burim konfidencial nga komisariati, "Buzë derri" ka pohuar se ka qëlluar ndaj Nuhos sepse kishte pasur me të "një sherr të vjetër". Nuho gjithashtu është shpallur në kërkim.

//Shqiptarja.com