Fillon ndërtimi i shtesës së Bashkisë

TIRANE (8/10/2001) Tani Bashkia do të ketë një godinë të re. Prapa Kullës së Sahatit në pronën që i përket këtij institucioni, ka nisur ndërtimi i një objekti të ri që do të ketë një sallë të madhe ceremonish: sallën e mbledhjeve të Këshillit Bashkiak e disa zyra të tjera të gjendjes civile. Ndërtimi i shtesës së Bashkisë do të kushtojë 89 milionë lekë, para këto të marra nga të ardhurat e institucionit. Firma fituese e tenderit është "Gjikuria", ndërsa godina e re do të ketë të njëjtën arkitekturë me godinën e Bashkisë. Sipas bashkiakëve, ndërtimi i kësaj godine është më se i nevojshëm për shkak se zgjidh disa nga kërkesat më kryesore, siç është salla e mbledhjeve të Këshillit Bashkiak, që deri tani ka munguar. Po kështu, ndërtimi i sallës së ceremonive do të krijojë një atmosferë te re, ndryshe nga ajo që ka ekzistuar deri tani në Bashki, ku martesat janë kryer në një zyrë të vogël në të cilën njerëzit s'kanë ku të lëvizin.

//Shqiptarja.com