Marrëveshjet me Malin e Zi Hekurudha, projekti kryesor

SHKODER (5/12/2001) Hekurudha e vetme ndërkombëtare, që lidh Shqipërinë me pjesën tjetër të Europës, pikërisht ajo e Hanit të Hotit, mesa duket do të fillojë rikonstruksionin. Burime nga Drejtoria e Transportit, pranë ministrisë së Transportit, vijnë sinjale pozitive për financime në hekurudhën e Hanit të Hotit. Për momentin, bëhet fjalë vetëm për pjesën e dëmtuar, 12 kilometër, segment i cili gjatë trazirave të '97-ës, u shkatërrua plotësisht për t'u shitur në Mal të Zi. Sipas Qemal Sinës, përgjegjësi i drejtorisë së transporteve, financimi për hekurudhën, do të mundësohet nga fondi shtesë, i akorduar nga Banka Botërore. "Jemi në tratativa direkte. Flitet për një shtesë fondi nga Banka Botërore, rreth 600 milion lekë. Ministria e jonë, ka menduar që fondin e akorduar për të, t'ia kalojë rikonstruksionit të hekurudhës". Duke vazhduar më tej, Sina pohon se kemi të bëjmë me 310 milion lekë, të cilat do të shpenzohen thjesht për segmentin e dëmtuar. "Eshtë bërë studimi paraprak për 10-12 kilometër. Kemi në dorë disa variante, të cilat nuk janë zbatuar, thjesht për mungesë fondesh. Banka Botërore tashmë na lë hapësirë për të menduar mbi realizimin e kësaj ide. Që çdo gjë do të konsiderohet e përfunduar, duhet të pritet firma e Ministrisë së Financave, pasi mementalisht, ne kemi dërguar atje kërkesën tonë si dikaster". Ministria e Transporteve, ka menduar që gjërat t'i bëjë me sa më pak shpenzime, pasi ajo ka marrë në konsideratë vetëm pjesën e prishur të hekurudhës. "Qëllimi i parë i yni është futja në punë e hekurudhës ndërkombëtare. Në kushtet e pamundësisë të sigurimit të fondeve për riparim të plotë, ne menduam që ta bëjmë atë të paktën funksionale". Ministria e Transportit, është përpara të gjitha ministrive të tjera, përsa i përket marrëveshjeve dhe bashkëpunimit me Malin e Zi. Ajo tashmë po punon për marrëveshjet në fushën e transportit liqenor, ajror, detar dhe rrugor. Sipas Sinës, për të gjitha këto marrëveshje ka dhe kontrata-tip të cilat janë vendosur të diskutohen ndërmjet ekspertëve. "Eshtë vendosur dhe data e takimit të ekspertëve në 15-ditëshin e dytë të muajit prill. Por për shkak të zgjedhjeve në Mal të Zi, takimi nuk u bë". Dy vendet, pra Mali i Zi dhe Shqipëria, janë plotësisht të gatshme për zbatimin e këtyre marrëveshjeve, për të cilat po punohet intensivisht, por pengesa e vetme është problemi i pozicionit institucional i Malit të Zi" përfundon Sina.

//Shqiptarja.com