Nehati merr 12 vjet burg

TIRANE (19/1/2001) Vetëm 12 vjet burg për Nehat kullën. Kjo është masa e dënimit të dhënë nga Gjykata e Shkallës së Parë për të pandehurin, mbi të cilin rëndonin 46 akuza. E megjithatë, Kulla është dënuar për akuzat më të lehta, atë të armëmbajtjes pa leje, fallsifikimit të dokumenteve dhe pasaportave. Kryetari i trupit gjykues Ilir Mustafaj, në arsyetimin e vendimit prej dhjetëra fletësh, rrëzoi të gjitha akuazat e tjera. Sipas tij, për Kullën nuk ka pasur prova nga organi i akuzës, dhe gjykata nuk është bindur për fajësinë e tij. Kjo fjali është përsëritur për vrasjen me paramendim të shtetasit Fatmir Thaçi, për të cilën Prokuroria akuzonte Nehat Kullën. Kjo akuzë nuk mund të provohet vetëm nga një dëshmi, që është e motrës së viktimës dhe e marrë në kushtet e burgut. Kryetari i trupit gjykues pothuajse në të gjtha arsyetimet ka përdorur logjikën dhe togfjalëshat e avokatit të Nehat Kullës. Burgim të përjetshëm, kishte kërkuar organi i akuzës për këtë vepër penale, ndërsa gjykata i dha dje pafajësinë. Të njëjtin fat kanë pasur edhe akuzat e tjera të rënda. Vrasja e mbetur në tentativë e tetë policëve, ka qenë akuza tjetër, për të cilën është kërkuar burgim i përjetshëm. Katër policë kanë mnbetur të plagosur, ndërkohë që automatiku, me të cilin është qëlluar në drejtim të tyre, është gjetur në shtëpinë e Nehat Kullës. Arsyetimi i gjykatësit Mustafaj në lidhje me këtë akuzë ka qenë: mungon lidhja kauzale, pra nuk shpjegohet arsyeja pse Nehat Kulla kishte qëlluar në drejtim të furgonit të policisë. Por trupi gjykues ka marrë si të vërtetë edhe alibinë e ngritur nga mbrojtja për akuzën e makinës me armatime e municion. Sipas Kullës dhe avokatit të tij, këtë makinë e kishte sjellë në Tiranë shtetasi Halil Haklaj, nga Tropoja. Ky person është ekzekutuar para një viti e gjysmë dhe dëshmia e tij ka qenë e pamundur para drejtësisë. Këtë fakt ka shfrytëzuar edhe i pandehuri dhe ia ka dalë mbanë. Nga gjykata e shkallës së parë ka dalë pa i hyrë gjemb në këmbë për akuzat që do ta çonin në qeli përjetësisht. Edha akuza për krijim bande të armatosur është hedhur poshtë me atrsyetimin që i mungojnë elementet e bandës dhe veprimtaria kriminale. Nga kjo akuzë ka shpëtuar edhe i pandehuri tjetër Ismet Ramadani, i cili është dënuar me 3 vjet heqje lirie. "Gjykata çmon se shtetasit Gëzim Ziri nuk i është kufizuar liria", është shprehur Mustafaj, në lidhje më akuzën e heqjes së paligjshme të lirisë së këtij personi, i cili është parë i përgjakur në një kasetë. Edhe kjo akuzë është rrëzuar dhe Nehat Kulla është çliruar nga barrat e rënda. Por, duket se vetëm përkohësisht. Prokuroria është shprehur se çështja do të shkojë menjëherë në Gjykatën e Apelit. Edhe avokati Dino Leli është shprehur i pakënaqur me numrin e vitëve që u dënua klienti i tij. "Unë kisha të drejtë, tha ai, se klienti im nuk mund të akuzohej pa prova". Vendimi për rrëzimin e akuzave të rënda ka kënaqur dje të gjithë miqtë e Nehatit, të cilët kishin ardhur për të ndjekur procesin. Ndonëse në fillim të tij kanë qenë të tensionuar, madje kanë bërë edhe rrëmujë ndërsa hynin në sallë, në fund kanë dalë duke qeshur. Vetë i pandehuri Nehat Kulla nuk ka marrë pjesë në gjyq me arsyetimin se është i sëmurë, por, sipas disa burimeve të tjera, ka qenë gjendja e tij emocionale shkaku i vërtetë që ai nuk është paraqitur.

//Shqiptarja.com

TAG:
• Nehat Kulla