"Snajperi" i 313 nis të flasë në burgun e Elbasanit

TIRANE (5/12/2000) Snajperi i vrasjes së Ilir Bardhit nis të flasë në qelinë e tij në Elbasan. Burime nga grupi i hetimit bëjnë të ditur se i pandehuri kryesor për këtë vrasje, Roland Kostare, tashmë ka filluar të flasë. Kostari nis rrefimin Ai, gjatë seancave të pyetjeve, ka thënë shumë gjëra çka ka çuar në përpilimin e një dosjeje që mund t'i shtojnë atij në bankën e të akuzuarve edhe emra të tjerë të implikuar në këtë vrasje. Sipas prokurorëve, gjatë pyetjeve është bërë e qartë se në gjykatë ai nuk do të zbresë i vetëm, pasi krahas tij do të jenë edhe njerëz të tjerë, që do të arrestohen nën të njëjtën akuzë. Kostare, pas arrestimit është dërguar në qelitë e paraburgimit në Elbasan, ku dhe është marrë në pyetje disa herë nga prokurori Saimir Hysi, i cili është detyruar të bëjë punën e tij në vajtje-ardhje Tiranë-Elbasan. Megjithëse deri tani prokurorët janë shumë të kënaqur me hetimin dhe sidomos me faktin se Kostare ka nisur të bëlbëzojë, nuk kanë bërë të ditur ndonjë hollësi për ato që janë thënë prej tij. Kjo pasi akoma nuk ka përfunduar hetimi dhe hollësitë nuk mund të publikohen pa u kopsitur dosja dhe ajo të marrë rrugën për në gjykatë. Pse në Elbasan? Transferimi i tij është bërë për shkaqe sigurie. Derisa në burgun 313, ku Kostare kreu vrasjen e bujshme, ndodhet shoku tjetër i viktimës, Ferhati, është e pamundur të qëndroje aty edhe Kostare, pasi mund të sillte probleme. Prokurori Saimir Hysi ka udhëtuar më shumë se tre herë drejt Elbasanit pavarësisht se është jashtë juridiksionit të tij, pasi qëndrimi i Kostares nuk është i mundur në burgun 313, kurse në ndonjë burg tjetër nuk ka masa të larta sigurie. Kështu, duket se Kostare nuk do të jetë i vetëm në përballimin e akuzës për vrasje dhe për këtë duket se ka qenë ai që ka ndihmuar, duke nisur të hapë gojën për Prokurorinë. Sipas grupit të hetimit, afati për të hetuar vrasjen është 6 muaj dhe deri tani kanë kaluar vetëm dy të tillë. Prokuroria ka në dispozicion mjaft kohë për të bërë gati dosjen, e cila do të mbërrijë në gjykatë. Janë edhe 4 muaj në dispozicion të saj për të pasur një hetim sa më të plotë e pse jo edhe për të dërguar në gjykatë bashkë me dosjen edhe njerëz të tjerë të akuzuar. Dosja "Gina" akoma pezull Ndërkohë dosja tjetër që sapo ishte bërë gati të fillojë gjykimin në gjykatë është sërish pa gjyqtar. Vrasja e Denis Ginës dhe Median Shehut, pas largimit nga gjykata të gjyqtares Marjana Laska, ka ngelur akoma pa u caktuar se në dorë të kujt gjyqtari do të jetë. Ndërkohë, që ishte caktuar edhe data e gjykimit, Laska është emëruar në Apel, kështu që fillimi është bërë edhe më i largët, megjithëse kanë kaluar kohë që është mbyllur hetimi nga ana e Prokurorisë. Vrasja në burg Kështu, cikli i vrasjeve të njëpasnjëshme të njerëzve dikur shokë me njëri-tjetrin, ka ngelur akoma në qetësi, që akoma nuk po merr rrugën e gjykimit në gjykatë. Ilir Bardhi u vra brenda në dhomën e ajrimit në burgun e sigurisë së lartë 313 me një snajper të tipit "Zig Zajer", dy muaj më parë. Vetëm 10 minuta pas vrasjes, policia mundi të arrestojë autorin Roland Kostare, kurse njeriu i dytë, i cilësuar si pjesëmarrës në vrasje, Alban Dani, u vra vetëm një javë më pas, për t'u pasuar me një cikël të tërë vrasjesh të tjera.

//Shqiptarja.com