Sociale

Borë në Tiranë? Ja si përgjigjet meteorologu (VIDEO)

Reshjet e dëborës mëngjesin e sotëm kanë shkaktuar probleme në disa akse të vendit. Kështu në aksin rrugorë Korçë-Dardhë, kalimi i mjeteve të vogla duhet bërë me zinxhirë, ndërsa në rrugën nacionale Maqellarë-Peshkopi automjetet kanë mbetur të bllokuar rreth 1 orë për shkak të reshjeve të dëborës. Nga ana tjetër kryeqyteti është përshirë gjatë ditës së sotme nga reshje të pakta shiu dhe vranësira.

Doris Sallaku
12 Janar 2020, 15:21 | Përditesimi: 12 Janar 2020, 15:32

TIRANË- Kryeqyteti këtë mëngjes është zgjuar nën ngjyrat gri të dimrit. E ndonëse në Tiranë shumë rrallë jemi mësuar të shikojmë dëborë, ndryshe ndodhë me qytete e tjera.

Në Korçë reshjet e dëborës kanë vijuar përgjatë natës dhe mëngjesin e sotëm, ku në disa zona të caktuara trashësia ka arritur nga 5 deri në 10 cm. E pikërisht për këtë arsye, në aksin rrugorë, Korcë-Dardhë, nga kilometri i 5 në të 14, kalimi i mjeteve të vogla duhet bërë me zinxhirë.

Reshjet e dëborës kanë shfaqur probleme në qarkun e Dibrës, ku në Lurë, Kala e Dodës e në Reç, ku trashësia e dëborës ka arritur deri në 15 cm. Rruga nacionale Maqellarë-Peshkopi ka hasur probleme në qarkullim, ndaj automjetet kanë mbetur të bllokuar rreth 1 orë.

LEXO EDHE:
Mos harroni çadrat! Reshje shiu dhe dëbore në zonat malore, parashikimi i motit për këtë javë

Por çfarë thotë meteorologu Hakil Osmani për reshjet e dëborës?

“Reshjet e dëborës do të shfaqen ditën e sotme gjatë mesditës dhe në vijim, por do të jenë reshje të pakta në zonat malore verilindore dhe lindore”-u shpreh meteorologu

Në rrugët e zbrazura të kryeqytetit ka pasur dhe reshje të pakta shiu, që sipas meteorologut do të vijojnë përgjatë ditës së sotme.

“Duke filluar nga dita e hënë dhe në vijim pritet që kushtet atmosferike të përmirësohen në territorin shqiptar duke sjellë mbizotërimin e kthjellimeve në vend. Edhe vranësirat do të jenë prezente por do të jenë kryesisht në zonat malore. Vlerat termike do të kenë një rritje të lehtë të tyre në mëngjes ndërsa më e ndjeshmja do të jetë në vlerat maksimale gjatë mesditës duke shënuar dhe 15 gradë Celsius që në fakt janë 2-3 gradë më të larta se vlerat tipike të muajit janar”- tha Hakil Osmani.

Pavarësisht dëshirës së madhe për të shijuar dëborën në Tiranë, gjasat janë të pakta.

B.K./Shqiptarja.com

TAG: