Adolf Hitler, vjen në
shqip “Mein Kampf”

TIRANE - Traktati famëkeq politik i Hitlerit "Mein Kampf" (Lufta ime) sapo është botuar në gjuhën shqipe. Shtëpia botuese "BELINA H.", njoftoi dje këtë botim, i njohur si një nga librat më me ndikim të të gjitha kohërave. I ndodhur, prej vitesh, në raftet e pjesës dërmuese të librarive të botës, tashmë traktatin famëkeq politik të Hitlerit do ta gjeni edhe në libraritë shqiptare.

Ky libër i ndërthurur me element autoniografikë, është i domosdoshëm për të kuptuar më mirë Holokaustin dhe totalitarizmin e çdo ngjyre. Ëështë një paralajmërim për të nesërmen, për brezat e rinj, në mënyrë që çmenduria e messhekullit të XX të mos përsëritet më kurrë. Botimi i këtij libri është nëj kambanë për të gjithë ata që e shohin si një objekt në lëvizje që magjeps, tmerron dhe shpesh nxit projektime absurde.

Botimi i këtij libri - ku Adolf Hitleri farkëtoi si një bombë me sahat, tërësinë e ideve mbi nacionalizmin, pangjermanizmin, eugjenizmin, racizmin, etj - është i rëndësishëm pasi ky libër përcaktoi historinë e Europës. Autori i këtij libri pasi shkatërroi, dogji me dhjetra kombe, vrau dhjetëra milionë njerëz, çoi në shkatërrim total dhe vetë kombin e tij.

Adolf Hitleri ishte demagogu më i madh që ka parë bota deri më sot sundues tiran, një figure e tmerrshme, një monstër që urdhëroi krimet më makabre. Mendja e tij e sëmurë, në emër të pastërtisë së racës, projektoi dhe urdhëroi eliminimin e 6 milionë hebrenjve të pafajshëm.

Në fund të jetës së tij, Adolf Hitleri ishte i vetmi nacional-socialist që me të drejtë mund të thoshte se nuk kishte qenë kurrë, as një pasues, as një nxënës dhe as një dishepull. Ai, më shumë se çdo despot tjetër, mundi t'i bindte pasuesit e tij se ishte mishërimi i një ideali, të cilit tani i kishte ardhur koha. Kjo ishte dhe origjina e vërtetë e hirit të Hitlerit.

Rruga mëse e jashtëzakonshme e jetës së tij ka treguar se si idetë e mbrapshta, të përhapura si ide misionarësh, mund të çojnë në programe politike plotësisht të çmendura dhe në tragjedi me përmasa botërore. Sipas botuesit, "Ky libër duhet lexuar që t'i hiqet velloja e misterit që e rrethon, për të parandaluar ekstremizmin dhe urrejtjen e çdo lloji. Mein Kampf duhet të shihet si objekt historik". (shqiptarja.com)