Akademia e PS, Rama:
Të rrëzojmë gënjeshtrën publike

Kreu i PS, Edi Rama, mbajti një fjalim të shkurtër në takimin e sotëm me aplikantët për Akademinë Politike të PS. Akademia Politike e PS organizohet nga Drejtori i Fondacionit “Qemal Stafa” Saimir Tahiri sëbashku me Profesor Maqo Lakrorin dhe drejtorin e Fondacionit “Friedrich Ebert".

“Jam i mbresuar pozitivisht nga fakti se kaq shumë të reja dhe të rinj i janë përgjigjur ftesës për aplikim në Akademinë tonë politike. Kjo tregon se politika nuk e ka humbur rolin e saj pavarësisht shkurajimit. Me gjithë baltën dhe pisllëkun që kanë mbuluar rolin e politikës dhe shkelësit e etikës që i paraqiten politikës si politikanë, më vjen mirë që politika nuk ka munduar të japë shembullin e keq, mësimin e gabuar, modelin më të mbrapshtë të krijuar tek ju që pas rënies së dikaturës.

Të merresh me politikë do të thotë të rrëzosh gënjeshtrën publike, duke bashkuar zërin tënd të dobët me atë të fortin e kolektivit. Të merresh me politikë do të thotë të militosh për një shkollim më të mirë, të militosh për një punësim më të mirë, do të thotë të mos e pranosh realitetin ashto si ta imponojnë por të imponosh ti zërin tënd.

Duhet të ndryshojmë pajmen e shëmtuar të politikës por edhe efekteve që ajo ka në jetën tonë. Ju mendoni se nuk ja vlen se të gjithë janë njëllojë. Por idetë nuk janë njëllojë. Nëse e keni të vështirë të besoni te politikanët besoni në njeri tjetrin dhe hidhuni në politikë për të sjellë ndryshimin.

Ndryshimi do të vi me gjithë fuqinë e vetë, edhe koha e ndryshimit të stafetave do të vi. Tentoni ta gjeni veten në vendin e duhur kur ndryshimi të vi” tha Rama. ah/shqiptarja.com/