BORSH- Një aksident i rëndë me pasojë vdekjen e dy personave ka ndodhur në Borsh. Ngjarja ka ndodhur rreth orës 13:40, në aksin rrugor Borsh-Sarandë, ku u përplasën një mjet tip 'Benz', me një furgon.

Si pasojë humbi jetën drejtësi i furgonit Kujtim Mehmeti, rreth 60 vjeç, si bashkëshortja e tij, e cila aktualisht nuk është identifikuar me emër.

Drejtuesi i 'Benz'-it, Myfit Qevani, ndodhet në gjendje të rëndë shëndetësore.

Në vendin e ngjarjes kanë mbërritur ambulanca dhe grupi hetimor nga Komisariati i Sarandës, të cilët po punojnë për zbardhjen e plotë të rrethanave të aksidentit.

Gjithashtu prezente janë edhe forcat e Zjarrfikëses me mjetet e tyre, pasi dy viktimat burrë e grua, si pasojë e përplasjes, kanë mbetur brenda mjetit furgon të dëmtuar rëndë dhe është dashur ndërhyrje e specializuar për nxjerrjen e tyre.

Dyshohet se fuoristrada lëvizte në kraun e kundërt me shpejtësi tej normave të lejuara, rreth 200 km/h dhe nuk ka pasur asnjë tentativë frenimi në momentin e aksidentit.

Çifti i bashkëshortëve që humbën jetën kishin shkuar për të tregtuar peshk në Borsh. Të dy kishin vendosur rripat e sigurimit dhe ndodheshin në korsinë e tyre në momentin e aksidentit.

Njoftimi i Policisë:

“Rreth orës 13:40, në aksin rrugor Borsh-Sarandë, ka ndodhur një aksident i rëndë rrugor ku janë përfshirë dy automjete:

Një automjet tip Benz, me targë AB637CX, i drejtuar nga shtetasi Myfit Qevani, i cili ndodhet në gjendje të rëndë shëndetësore.

Një automjet tjetër tip Benz Vito, me targë AA052NV, me drejtues Kujtim Mehmeti, rreth 60 vjeç, si dhe pasagjerja – bashkëshortja e tij, e cila aktualisht nuk është identifikuar me emër.

Si pasojë e përplasjes, dy personat e fundit (bashkëshortët) kanë humbur jetën.

Në vendin e ngjarjes kanë mbërritur ambulanca dhe grupi hetimor nga Komisariati i Sarandës, të cilët po punojnë për zbardhjen e plotë të rrethanave të aksidentit”.