Aksioni i IKMT-së në Vlorë,PD: Ata
që po rrënojnë do mbajnë përgjegjësi

Aksioni i IKMT-së në Vlorë për prishjen e ndërtesave në bregdet ka hasur kundërshtime nga banorët dhe nga bizneset, ku sipas tyre vlerësimi i shpronësimit është shumë i ulët.

Ditën e djeshme ka pasur edhe konfrontime mes banorëve dhe policisë ku kundërshtonin me forcë prishjen e banesave.

Sot sekretari për aksionin qytetar, Salijani ka zhvilluar një takim me banorët e Vlorës, ku është shprehur se zyrtarët që po sjellin këtë rrënim do mbajnë përgjegjësi para ligjit.

Sipas Salianjit, Rama po rrënon pronat e qytetarëve të Vlorës pa paralajmërim, në shkelje të ligjit, dhe nuk po i dëmshpërblen sipas vlerës së tregut. 

Deklarata e plotë e Sekretarit për Aksionin Qytetar, Salianji: 
Isha sot në emër të PD për të takuar pronarët të cilët preken nga shpronësimi i padrejtë shpërfillës i Edi Ramës dhe qeverisë së tij. Siç e shihni këtu cënohen jo një, jo dy, jo tre, por qindra familje të cilat punojnë në këto biznese. Kanë një vlerësim prej 6,7 milion euro, vlerësim i bankës, ndërkohë që Edi Rama e vlerëson me 290 milion lekë të vjetra. Ndërkohë dhe projekti i Lungomares ka tri vjet që zvarritet nga ana e Edi Ramës dhe Ramës së vet në bashki.

Në emër të Partisë Demokratike i garantoj qytetarët se Partia Demokratike do të bëj një ligj, sapo të vijë në pushtet në të cilin do të vlerësojë dhe do të shpronësojë me vlerën reale të gjitha ndërtime e prekura në mënyrë të paligjshme nga Edi Rama, të shkatërruara në mënyrë të paligjshme nga Edi Rama.

Po ashtu Partia Demokratike ka ngritur një ekip ekspertësh të cilët po vlerësojnë, po evidentojnë dhe po listojnë të gjitha pronat e prekura të qytetarëve kudo në Shqipëri, në Vlorë dhe në të gjithë territorin e vendit.

Dua të garantoj qytetarët që u preken pronat, se zyrtarët të cilët nuk zbatojnë ligjin, por vetëm fjalën e Edi Ramës, në mos sot, nesër, do të mbajnë përgjegjësi një më një para ligjit, ashtu sikurse e parashikon ligji dhe Kushtetuta e Republikës së Shqipërisë, që çdo prekje prone në mënyrë të paligjshme mbahet përgjegjësi para ligjit dhe do të shkohet në burg. Edi Rama është si ajo edukatorja e kopshtit dje, ku i dhunon të pambrojturit, i dhunon të pamundurit dhe pastaj vjen e bën selfie për reklamë”, u shpreh Salinaji.
 
Redaksia Online 
(xh.k/shqiptarja.com)