Akuza të reja për djalin e Presidentit Biden! Eskorta, drogë dhe faqe pornografike, shpenzoi miliona dollarë për një jetë ekstravagante në vend që të paguante taksa! Rrezikon 17 vite burg

"Ai shpenzoi miliona dollarë për një mënyrë jetese ekstravagante në vend që të paguante taksa." Është një nga pasazhet e përfshira në 56 faqet e paraqitura në gjykatën federale në Los Angeles, Kaliforni, në lidhje me Hunter Biden. Djali i presidentit amerikan Joe Biden është paditur për nëntë krime tatimore, tre kanë të bëjnë me akuza të rënda lidhur me evazion fiskal, gjashtë për krime të lehta, por gjithmonë të natyrës tatimore. Për të është procedimi i dytë, pas atij që filloi në Delaware për mospagesë taksash dhe deklarime mashtruese në FBI për blerjen e një arme, dhe që merret gjithmonë nga superprokurori David Weiss, i emëruar nga Departamenti Amerikan i Drejtësisë për të ndjekur hetimet në lidhje me djalin e Biden.

Akuzat e reja

Akuzat e reja vijnë disa orë pas vendimit të republikanëve të Dhomës së Përfaqësuesve për propozimin për të nisur zyrtarisht një hetim për të vlerësuar nëse Biden, i dyshuar për ndërhyrje në punët e djalit të tij, duhet të shkarkohet. Hunter tani akuzohet se ka shmangur taksat për katër vjet, dhe jo vetëm dy, siç doli në hetimin e parë, dhe se nuk kishte paguar 1.4 milionë dollarë taksa të detyruara midis viteve 2016 dhe 2019. Në hetimin e parë ai u akuzua se kundërshtoi për të paguar njëqind mijë dollarë për dy vjet. Për më tepër, në vitin 2018, Biden Jr paraqiti një sërë informacionesh të rreme për të marrë një reduktim të të ardhurave të tij të tatueshme dhe për të paguar më pak taksa.

Si do t'i shpenzonte paratë

Aktakuza pretendon se ai i shpenzoi paratë e tij për "drogë, të dashura, hotele luksoze dhe prona me qira, makina ekzotike, rroba dhe sende të tjera të natyrës personale - me pak fjalë, gjithçka përveç taksave".

Sipas asaj që shkruajnë prokurorët, nga viti 2016 deri në vitin 2019 ai ka tërhequr vetëm 1.6 milionë dollarë nga bankomatet. Dhe në të njëjtën periudhë, ai shpenzoi më shumë se 683,000 dollarë për "pagesa për femra", gati 200,000 dollarë për "argëtimin e të rriturve ", 397,530 dollarë për veshje dhe aksesorë dhe 237,496 dollarë për shëndetin e bukurinë.

Në mesin e 56 faqeve të aktakuzës renditen shumë nga hotelet luksoze ku Hunter Biden ka qëndruar në vitet në të cilat ai zgjodhi të mos mbante një rezidencë dhe që i përdori "për festa të vazhdueshme", thonë prokurorët.

Pastaj është marrja me qira e një Lamborghini, 1500 dollarë për një balerin ekzotik në një klub striptizi, 11500 dollarë për një eskortë "për dy netë", pothuajse 30 mijë dollarë për një faqe pornografie në internet dhe 10.000 dollarë "për një anëtarësim në një klub seksi".

Ai rrezikon 17 vite burg

Nëse shpallet fajtor, djali i presidentit përballet me një maksimum prej shtatëmbëdhjetë vjet burg, megjithëse mesatarisht dënimet federale për këto lloj krimesh janë më pak të ashpra. Por mundësia e burgut duket më pak e largët.

Reflektime mbi fushatën e Joe Biden

Problemet e Hunter janë të destinuara të kenë një ndikim të madh në fushatën presidenciale të vitit të ardhshëm dhe të dobësojnë figurën e babait të tij. Republikanët nuk do t'i japin atij pushim. Në të njëjtën kohë, në mënyrë paradoksale, lajmi për aktakuzën e re të Hunterit nuk është një lajm i mirë për Donald Trump dhe aleatët e tij, sepse e bën strategjinë e të ‘përndjekurit’ më pak të besueshme. Manjati, i akuzuar në katër hetime për përpjekjen e tij, në cilësi të ndryshme, për të përmbysur rezultatin e zgjedhjeve në vitin 2020, është mbrojtur gjithmonë duke akuzuar Departamentin e Drejtësisë se ka përdorur kompetencat e saj për të eliminuar kundërshtarët e presidentit. Trump foli për "regjimin diktatorial" të vendosur nga Biden, por tani që djali i presidentit ka përfunduar në telashe të reja ligjore, do të jetë më e vështirë ta mbështesë atë./La Repubblica

SI.E./r.k./Shqiptarja.com

TAG:
• Hunter Biden
• Joe Biden
• SHBA