Aleatët e Berishës:
Lulzim Basha na tradhtoi

Aleatët e Partisë Demokratike në zgjedhjet e 8 Majit në Tiranë janë të pakënaqur nga përfaqësimi i tyre në administratën e re të Bashkisë së Tiranës. Ata ndjehen të tradhtuar dhe injoruar, pasi Basha nuk e njeh më marrëveshjen parazgjedhore. Aleatët e PD, pa të cilët Basha mund të merrte vetëm 77 mijë vota nga 125 që mori tjetri, theksojnë se përfaqësimi i tyre në administratë nuk përputhet me kontributin e tyre në zgjedhjet e 8 Majit, çka mundësoi që kandidati i djathtë të merrte vota po aq sa Edi Rama. Pra, pasi mori mandatin e kryebashkiakut me anë të Sashenkës dhe Ristanit, Lulzim Basha ka injoruar kontributin e aleatëve, duke e zëvendësuar administratën 10-vjeçare me kunetërit, farefisin, miqtë, sekserët, të fortët dhe ithtarët e Partisë Demokratike që bërë kubanin.

Nëse do t’i referohemi kontributit të të vegjëlve në fitoren e Bashës, aleatët duhet të përfaqësojnë gjysmën e administratës së bashkisë. Por, pasi rrënoi një administratë profesionale dhjetëvjeçare me spastrime arbitrare, Bashkia e Tiranës është zaptuar nja klanet e kryebashkiakut. Ndërkohë, aleatët shprehen të pakënaqur me përfaqësimin e tyre. Deputeti i Partisë Drejtësi Integrim dhe Unitet, Dashamir Tahiri, theksoi për gazetën “SOT” se kërkesat e kësaj partia për përfaqësim në administratën e partisë ende nuk janë zbatuar, edhe pse ka disa muaj se është zgjedhur kryetari i bashkisë. Deputeti Tahiri theksoi se kjo është çështje kohe dhe negociatash. Po ashtu, republikanët këmbëngulin për shumë përfaqësim në bashki. Nënkryetari i Partisë Republikane, Arjan Madhi, vlerësoi kontributin e PR në fitoren e Bashës. Ai theksoi se çdo parti kërkon maksimalen, por shtoi se megjithatë PR i qëndron marrëveshjes me Partinë Demokratike. Nga partitë aleate, vetëm Lëvizja Socialiste për Integrim dhe Partia e Legalitetit duket se janë të kënaqura nga ndarja e pushtetit në Bashkinë e Tiranës.