Ali Evsen i bllokohen llogaritë
bankare dhe 4 avionë

TIRANE- Gjykata e Tiranës ka urdhëruar bllokimin e llogarive bankare të kompanisë ajrore “Albania Airlines” si dhe sekuestrimin e 4 avionëve të kësaj kompanie, prona të biznesmenit Ali Evsen. Shtetasi turk, me pasaportë shqiptare, u arrestua pak kohë më parë në Spanjë për pastrim parash.

Biznesmeni, i cili gjatë gjithë vizitës që kryeministri Berisha zhvilloi në Azerbajxhan javën e kaluar, u shfaq gjithnjë në krah të tij rezulon se ka rreth 1.6 milion euro borxh 2 kompanive holandeze, “Global Collection Service B.P GCS” dhe “Global Collect B.P”, dhe shoqërisë Tirana International Airport shpk.

Dy kompanitë holandeze dhe shoqëria Tirana International Airport shpk depozituan në gjykatën e Tiranës kërkesë padi për marrjen e masave për sigurimin e padisë, me qëllim garantimin e pagimit.

Tirana International Airport shpk, i kërkoi gjykatës marrjen e masave për sigurimin e padisë me qëllim garantimin e pagimit të shumës 1.064 253 euro, duke sekuestruar llogaritë bankare në emër të kompanisë së fluturimeve, Albanian Airlines.

Cështja është gjykuar nga gjyqtarja Elona Stavri e cila me vendim të datës 14 shkurt 2012 vendos pranimin e kërkesës dhe sekuestrimin e sendeve të luajtshme të regjistruara në emër të shoqërisë “Albanian Airlines” pranë Autoritetit Civil.

Ndërsa pak muaj më parë, gjyqtarja Blerina Muça gjykoi kërkesën për sigurimin e padisë nga 2 kompanitë holandeze, “Global Collection Service B.P GCS” dhe “Global Collect B.P”. Me vendimin e datës 19 dhjetor 2012, gjyqtarja vendos bllokimin e llogarive bankare si dhe sekuestrimin e 4 avionëve deri në masën e 646.907. 72 euro, debiti që Albanian Airlines i kishte këtyre kompanive.
(sg/shqiptarja.com)