Ambasada e SHBA spostohet në
Jeruzalem, aleatët presion Trump

Presidenti amerikan Donald Trump i ka bërë me dije presidentit palestinez Abu Mazen planin e tij për të zhvendosur ambasadën amerikane nga Tel Avivi në Jeruzalem.

Sipas mediave ndërkombëtare, njoftimi është përcjellë në një bisedë telefonike mes dy liderëve, gjatë të cilës Mazen paralajmëroi Trump për rreziqet që i kanosen nga një lëvizje e tillë procesit të paqes, sigurisë dhe stabilitetit në rajon dhe botë. “Mbi këtë çështje presidenti Trump ka qenë i qartë që në fillim.

Nuk bëhet fjalë për “nëse”, por për “kur””, deklaroi më herët zëdhënësi i Shtëpisë së Bardhë, Hogan Gidley, i cili shtoi se “një vendim” do të publikohet në ditët e ardhshme.

Kjo lëvizje e Uashingtonit zyrtar mund të përbëjë njohjen e Jeruzalemit si kryeqytet i shtetit hebre. Por sidoqoftë, vendimi mund të shtyhet, raporton CNN, që citon burime pranë administratës amerikane.

Kjo mund të vijë si pasojë e presioneve që kanë lindur brenda Shtëpisë së Bardhë, por edhe nga aleatët e huaj, nga kancelaritë europiane e deri tek ato të vendeve arabe.

Kjo ka bërë që të shqyrtohet se si të balancohet zhvendosja e ambasadës, për të marrë parasysh edhe qëndrimet e palestinezëve. 

G.F. / Shqiptarja.com