Amnistia fiskale, dje
përfundoi për bizneset

TIRANE- Përfundoi dje zyrtarisht afati i aplikimit për faljen fiskale për biznesin, ndërsa pritet të vijë në Kuvend një projektligj që të bëjë të mundur shtyrjen me pesë muaj të tjerë e këtij procesi për qytetarët, që kërkojnë të bëjnë rivlerësimin e banesave të tyre. Sipas burimeve nga ministria e Financave, pas 31 marsit do të zbatohen me rigorozitet masat e parashikuara në ligj për ushtrimin e kontrolleve dhe vendosjen e penaliteteve për detyrimet e prapambetura të biznesit ndaj administratës tatimore dhe doganore. Sipas Financave, nga ky proces janë shënuar arritje kryesisht në rivlerësimin e pasurisë së paluajtëshme. "Shtyrja që i është bërë amnistisë ka rezultuar e suksesshme përsa u përket indidividëve, pasi ka patur një numër të madh qytetarësh që kanë bërë rivlerësim të pasurisë së tyre të paluajtshme në tre muajt e parë të këtij viti".

Ndërkohë, përsa i përket faljes së borxheve tatimore e doganore, burimet shtuan se biznesi nuk paraqiti interesin e pritur. Por, edhe për individët, më shumë rezultate pati në rivlerësimin e banesave, ndërsa nuk kapi pritshmëritë legalizimi i parave "cash".

Falja fiskale nisi të zbatohet në datën 18 maj të vitit 2011 dhe parashikohej të përfundonte në 31 dhjetor të po këtij viti. Qeveria e shtyu afatin për një periudhë tremujore, nga data 31 dhjetor 2011 deri më 31 mars 2012, për të gjitha kategoritë e parashikuara në ligj, individë dhe biznese. Ndërsa të mërkurën kryeministri Berisha shpalli shtyrje deri në 31 gusht të këtij procesi vetëm për individët që duan të rivlerësojnë pasurinë, për t'u bërë të mundur edhe emigrantëve që kthehen në Shqipëri në sezonin veror të përfitojnë nga ky proces, theksoi ai.
(sg/gk/shqiptarja.com)