Amnistia fiskale, qeveria
fajëson biznesin

TIRANE- Duke deklaruar se nuk do të ketë më një shtyrje të dytë të faljes fiskale, dje zëvendësministri i Financave Alfred Rushaj tha për median se bizneset nuk e kanë përfillur atë në masën që parashikohej. Dështimi i kësaj nisme të qeverisë le të kuptohet se shumë subjekte do të vijojnë të mos paguajnë taksat e prapambetura në Tatime e Dogana, duke shpresuar në fshirjen e tyre në sajë të lidhjeve me pushtetarët.

Ligji i Faljes Fiskale nuk ka funksionuar siç duhet, të paktën në pjesën që i përkiste biznesit. I hartuar si një ligj do t'i vinte në ndihmë sipërmarrësve për të çliruar shuma të larta për ekonominë, sot kur bëhen bilancet shifrat janë tepër të papërfillshme. Këtë fakt e ka pranuar edhe Zëvendesministri i Financave, Alfred Rushaj, sipas të cilit pritej që biznesi të përfitonte më shumë nga Falja Fiskale.
Sipas tij, nga 1.5 miliardë dollarë kapital të legalizuar deri në javën e parë të muajit shkurt, pjesën më të madhe e kanë zënë individët, duke deklaruar të ardhurat e fshehura në banka dhe nga rivlerësimi i pasurive të patundshme, që llogariten më shtrenjtë sipas vlerësimeve më të fundit qeveritare.
Zbatimi i këtij ligji duhet të përfundonte në 31 dhjetor 2011, por ishin kërkesat nga shoqatat e ndryshme të sipërmarrjes së lirë që detyruan qeverinë të shtynte afatin me tre muaj, deri më 31 mars. Ligji për Faljen Fiskale ishte kërkuar fort nga biznesi dhe pritshmëritë ishin që me legalizimin e pasurive, ekonomisë shqiptare t'i injektoheshin rreth 4 miliardë dollarë kapital. Sipas zv/ministrit, janë legalizuar 31 milionë dollarë para dhe 1.4 miliardë dollarë asete. Deri 10-ditëshin e parë të shkurtit, ishin legalizuar rreth 3.1 miliardë lekë nga individët dhe është paguar për këto tatim legalizimi në masën vetëm 94 milionë lekë, duke qenë se detyrimi ishte mjaft i vogël, sipas përcaktimit në ligjin për faljen.

Ndërkohë, është bërë rivlerësim pasurie të paluajtshme dhe janë paguar për këto rivlerësime rreth 1.4 miliardë lekë, ndërkohë që individët kanë përfituar nga ky proces 12.7 miliardë lekë, apo 130 milionë dollarë që mund të përdoren për shitje apo kolateral për kreditim bankar, tha Rushaj.
(sg/shqiptarja.com)