Amnistia, rivlerësimi i banesave,
shtyhet afati deri në 31 gusht

Qytetarëve të interesuar për të bërë rivlerësimin e banesës me vlerën e tregut u ka mbetur më pak se një muaj e gjysmë kohë. Amnistia fiskale për pasuritë e paluajtshme përfundon me 31 gusht. Drejtori i Përgjithshëm i Zyrës së Regjistrimit të Pasurive të Patundshme, Arben Qirjako, ka deklaruar dje se rivlerësimi i pronës ka një rëndësi të veçantë, duke ftuar qyetarët të jenë pjesë e procesit. “Deri në fund të gushtit qeveria shqiptare ka shtyrë afatin për rivlerësimin e banesave vetëm për qytetarët. Duhet t’u bëj thirrje atyre që të shfrytëzojnë momentin e kësaj amnistie dhe të mos kujtohen në momentet e fundit siç ka ndodhur dhe herë të tjera. Në muajin mars të këtij viti, vetëm në dy javët e fundit, para se të shtyhej afati, në zyrën vendore të Tiranës aplikimet arritën në 700 mijë për rivlerësim të banesave”, shpjegon Qirjako.

Pjesë e rivlerësimit janë banesat e ndërtura para viteve 90. Qytetarëve u jepet mundësia që prona e tyre të marrë vlerën e tregut aktual, duke paguar si taksë vetëm 1 për qind të diferencës së vlerave të pronës pranë Hipotekës.

“Kjo lidhet me taksën e kalimit të pronësisë dhe rivlerësimi për një pasuri qytetari duhet ta dijë sa vlen sot. Vetëm në rastin e kalimit të pronësisë qytetari duhet të paguajë 10% të diferencës midis çmimit që e ka blerë dhe çmimit që po e shet. Në rast se kjo rivlerësohet dhe rivlerësimi është 1 për qind e vlerës së objektit, në rast të kalimit të pronësisë, kjo taksë do të jetë zero”, deklaron Qirjako.

Ligji për amnistinë fiskale, ku përfshihej edhe rivlerësimi i pasurive të paluajtshme të qytetarëve, ishte në fuqi deri në 31 mars të këtij viti. Qeveria vendosi të shtyjë afatin vetëm për rivlerësimin e banesave deri në 31 gusht, për t’u dhënë mundësi emigrantëve të bëhen pjesë e procesit, ndërkohë që amnistia për bizneset nuk u zgjat më tej.

(gk/shqiptarja.com)