Antimafia italiane: Nuk po
ndaloni kultivimin e drogës

TIRANË – Trafiku i lëndëve narkotike është pika më nevralgjike që shqetëson drejtësinë italiane dhe atë shqiptare. Bashkëpunimi në këtë fushë ka sjellë në Tiranë, prokurorin pranë drejtorisë së Antimafias së Leçes, Cataldo Motta dhe kreun e rojes bregdetare të Puglias, Franco Patroni.
Pas takimit me prokuroren e përgjithshme Ina Rama, prokurori italian Motta ka pohuar se në Shqipëri vazhdon trafikimi me gomone, tanimë jo për njerëz por për mariuanën. Nisur nga ky fakt ai ka bërë thirrje të kontrollohet prodhimin i kësaj droge në Shqipëri.
“Transporti me gomone është reduktuar shumë dhe përdoret vetëm për mariuanën. Dikur sillnin emigrantë, sot gomonet vijnë vetëm plot me mariuanë dhe 5 persona maksimumi.
Duhet të kontrollohet prodhimi i cannabis sativa. Nëse mariuana vazhdon të kultivohet në këtë masë me siguri duhet cuar në vende të tjera për tu shitur. Dhe kontrolli nuk është detyrë e as e imja dhe as e prokurores tuaj të përgjithshme”, tha Motta.
Sipas tij, mariuana kryeson listën e lëndëve të trafikuara me afro 20 ton në vit e pas saj vijnë heroina dhe kokaina.

MBETURINAT E PALIGJSHME, SHQIPËRIA JASHTË
Përfaqësuesit e drejtësisë italiane kanë pohuar se Shqipëria nuk është përfshirë në trafikun e mbeturinave të paligjshme, i cili prej kohësh është kthyer në një problem në Itali. Prokuroria Motta dhe numri një i rojes bregdetare në Puglia thanë së në skandalin me 14 kontenierët me mbeturina nuk ka shqiptarë të përshirë dhe se ky trafik është drejtuar për në vendet aziatike.

(aq/shqiptarja.com)