Arkitektët: Të riorganizohet
konkursi i 100 vjetorit të pavarësisë

TIRANE – Unioni Shqiptar i Arkitektëve, Urbanistëve dhe Planifikuesve ka shprehur sot shqetësimin për cilësinë jo të mitë të shumë prej punimeve të paraqitura në konkursin për monumentin e 100 vjetorit të pavarësisë dhe kanë kërkuar një riorganizim më të serioz të tij. Në një deklaratë ku mes të tjerash përshëndetet nisma e autoriteteve, arkitektët shqiptarë shpjegojnë se kjo cilësi e dobët “është rezultat sa i mangësive në formimin teknik, kritik e estetik të disa prej pjesëmarrësve por edhe i paqartësive në mënyrën e organizimit të konkursit. Fakti që në konkurs nuk është përcaktuar hapësira e kushtuar monumentit, duke mos qartësuar kontekstin urban ku do të ndrërhyet, ka ndikuar në mënyrë të pa mohushme cilësinë e punëve të paraqitura”.

Sipas Unionit të Arkitektëve, “vendimmarrja për këto çështje kërkon një punë serioze organizative dhe terma të qarta reference ku duhet të kontribuonin ekspertë dhe institucione të specializuara të historisë, urbanistikës, arkitekturës, artit, dizajnit dhe sidomos skulpturës e pejzazhit”. Për këtë Unioni inkurajon autoritetet “të mos nxitohen në përzgjedhjen e fituesit dhe t’a riorganizojnë këtë konkurs në bashkëpunim me partnerë të specializuar. Gjithashtu nxisim organizatorët të parandalojnë, përmes termave të referencës sa më të qarta reminishenca të artit totalitar apo nacionalizmat turbo-folklorike. Le të shmangim gabimet historike që kanë kryer edhe disa nga fqinjët tanë të cilët, në kërkim të një identiteti të ri, i kanë kthyer sytë nga monumentalizmi pseudo-historik”, thuhet në deklaratë.

“Le të garantojmë një proces transparent – përfundon reagimi publik - që siguron një produkt kulturor me cilësi dhe dinjitet për këtë moment historik mbarëkombëtar i cili mbart vlera më të larta se simbolikat sipërfaqësore”.

(Në foto një nga projektet në garë, paraqitur nga Sali Shijaku.)

(im/shqiptarja.com)

/Shqiptarja.com