POP 5

Lajmet më të lexuara të 5 minutave të fundit

Politikë

Armët kimike, Basha: Rama fyeu
miqësinë me SHBA, antiamerikan

Basha ka akuzuar kreun e qeverisë, Edi Rama, se me arrogancën e tij në qëndrimin për mbetjet kimike, ka fyer miqësinë me SHBA-në, por pa mundur ta cënojë atë.
Armët kimike, Basha: Rama fyeu<br />miqësinë me SHBA, antiamerikan
TIRANE- Mbledhjen e grupit parlamentar të PD-së, kreu i opozitës, Lulzim Basha e ka shfrytëzuar për t’i dhënë mesazhe të qarta jo vetëm mazhorancës, por edhe për të qetësuar “rebelët” brenda saj, se opozita gjatë protestës për mbetjet kimike, ka qenë e pozicionuar në anën e duhur. Basha ka akuzuar kreun e qeverisë, Edi Rama, se me arrogancën e tij në qëndrimin për mbetjet kimike, ka fyer miqësinë me SHBA-në, por pa mundur ta cënojë atë.

“Nuk kishte asgjë më amerikane në Shqipëri këto dy javët e fundit, sesa protesta e të rinjve. Amerikane ishte rezistenca e tyre dhe kërkesa për llogaridhënie ndaj qeverisë. Amerikane ishte qëndrimi i opozitës që nuk lejoi talljen në parlament të mazhorancës dhe vendosi që kauza e qytetarëve të ishte çështja e ditës. Amerikane ishte qëndrimi i medias dhe i shoqërisë civile që me profesionalizëm dhe përkushtim pasqyruan ngjarjen nga fillimi deri në fund. Vetëm mendja e tij mund të guxojë të ndërtojë  antiamerikanizëm me vlerat  e vetë demokracisë amerikane.

Vetëm mendja e tij alogjike gjen armiq, kur në një anë del  e thotë  nuk kemi kapacitete për t’i marrë  lëndët kimike, në anën tjetër  kërkon fajtorë te protestuesit, te  opozita, te  media e lirë. Me arbitraritetin e tij si kryeministër, Edi Rama e ka  fyer miqësinë  e vjetër e të thellë të  vendit  tonë me Shtetet e Bashkuara të Amerikës, por nuk e ka cënuar, nuk e  ka dëmtuar e s’mund ta dëmtojë. Askush nuk ka forcë ta bëjë ketë. Marrëdhëniet e Shqipërisë me Shtetet e Bashkuara të Amerikës janë të mbështetura në vlerat e   bashkëndashme  të demokracisë  dhe kauzës  për një botë më të sigurtë e më në paqe, ku ne luajmë e do të vazhdojmë të luajmë rolin tonë. Shqipëria është e do të mbetet vendi më proamerikan në Europë dhe kjo është  vendosur në shpirtin e lirë, në shpirtin mirënjohës  të  një kombi të tërë”, tha Basha.

Po ashtu Basha ka deklaruar se të rinjtë, që ishin në krye të protestës qytetare kundër armëve kimike nga Siria, u dhanë një leksion të mirë të gjithëve.

“Kjo është një fitore e madhe  e demokracisë, është një fitore e paçmuar e shoqërisë. E thashë të premten dhe dëshiroj ta përsëris  sërish sot me  krenari, se punën e madhe e bëri populli i bashkuar pa dallime politike,  e bëri rinia, si  forcë, si shpresë, si ëndërr  dhe aspiratë  demokratike e shëndetshme moderne dhe europiane.

Me këtë rast dua të shpreh edhe një herë, edhe në emrin tuaj, mirënjohjen, falënderimin dhe admirimin më të madh të gjithë të rinjve dhe të rejave, të gjithë qytetarëve shqiptarë që u bënë barrikadë e pakapërcyeshme  e aventurës dhe ëndrrës së keqe të kryeministrit  me armët kimike.

Si forcë politike, si opozita e vendit, kemi kënaqësinë të pohojmë sot se ishim në anën e duhur në këtë zhvillim historik,  në anën e vlerave të demokracisë perëndimore euroamerikane, në anën  e historisë  sonë politike si parti e lirisë, në anën e transparencës, në anën e së drejtës së qytetarëve për tu pyetur e për të vendosur për çështje  madhore  të jetës dhe dinjitetit të tyre.

Ne bëmë detyrën tonë  politike dhe institucionale. Dua t’ju falënderoj  dhe t’ju përgëzoj të gjithëve për qëndrimet që keni mbajtur  për këtë çështjen në aulën e Kuvendit dhe në aula të tjera të  politik-bërjes dhe komunikimit me publikun”, u shpreh Basha.

Pas deklarimit të kryeministrit Edi Rama se Shqipëria nuk do të pranojë armët kimike të Asaadit, për t’i shkatërruar, “Shqiptarja.com” raportoi se brenda PD-së ka pasur përplasje për mënyrën se si Lulzim Basha u deklarua gjatë protestave, duke e etiketuar si një pozicionim kundër SHBA-ve.

Redaksia Online
(e.s/shqiptarja.com)

  • Sondazhi i ditës:
    28 Nëntor, 09:20

    A e keni të qartë pse opozita organizon mosbindje civile?

Lajme të tjera



×

Lajmi i fundit

Lidhjet e Suel Çelës me Artan Hoxhën, Kikia në ‘Frontline’: Gazetaria mori goditje të jashtëzakonshme, gazetarë në shërbim të një prej organizatave më famëkeqe të krimit

Lidhjet e Suel Çelës me Artan Hoxhën, Kikia në ‘Frontline’: Gazetaria mori goditje të jashtëzakonshme, gazetarë në shërbim të një prej organizatave më famëkeqe të krimit

28 Nëntor, 23:04