Asambleja PS, rikthehen
mbështetësit e Nanos

TIRANE- Partia Socialiste informoi sot emrat e anëtarëve të Asamblesë së re Kombatëre e cila doli nga votimet e 1500 delegatëve të Kongresit të 5 nëntorit. Asambleja përbëhet nga 128 kandidatë burra dhe 61 kandidate gra.

Deputeti socialist Besnik Baraj lexoi të plotë emrat e përzgjedhur nga Kongresi për të qenë pjesë e forumit të lartë drejtues të Partisë Socialiste.
Ai falenderuar delegatët për votimin në orët e vona të mbrëmjes, si dhe numëruesit të cilët e bënë detyrën e tyre vullnetarisht. Baraj shpjegoi numërimin e ngadaltë për shkak se çdo votues është shprehur për 189 individë”

Në Asamblenë Kombëtare Edi Rama, ka vendosur të ndërthurë brezat e të vjetërve dhe të rinjve, duke plotësuar idenë e tij për bashkimin e madh në Partinë Socialiste, siç deklaroi në Kongres.

Në listën e të përzgjedhurve, (ashtu siç kishte botuar shqiptarja. com) janë emra si Anastas Angjeli, Agron Duka, Besnik Dervishi e Bashkim Zeneli, Ilir Zela, Mezan Malaj e Musa Ulqini, Petrit Ago apo Luan Hajdaraga, Natasha Paço apo Kozeta Fino, etj. të cilët kanë qenë bashkëpunëtorë të ish kryetarit të PS, Fatos Nano. Por që pas vitit 2005, në një mënyrë apo në një tjetër, kanë qenë të distancuar nga PS. Pas 6 vjetësh pa ndonjë aktivitet të dukshëm politik, ata rikthehen në listat për të qenë direkt anëtarë të Asamblesë Kombëtare të Partisë Socialiste.

Në listë janë dhe emrat e të rinjtë, të cilët, kanë "bashkëjetuar" me Edi Ramën sidomos në këto vite të vështira pas humbjes së zgjedhjeve të 2009 dhe humbjes së bashkisë së Tiranës në 2011. Kështu, emrat e Erion Veliajt, Aldrin Dalipi,  Arbi Maznikut, Artan Lames apo diplomatit analist Dritan Hila, të profesoreshës Iris Luarasi apo Adelina Farricit e Etjona Hoxhës, janë disa nga prurjet e reja që PS ka sjellë menjëherë pas zgjedhjeve të përgjithshme parlamentare dy vite më parë.
(s.g/shqiptarja.com)