Një shqiptar 34-vjeçar, në kërkim nga Italia për trafik droge, është arrestuar në Madrid.

34-vjeçari u vu në pranga gjatë një kontrolli kufitar në aeroportin Madrid-Barajas dhe do t’u dorëzohet autoriteteve italiane.

Hetimet në nivel ndërkombëtar zbuluan ndryshimin e gjeneraliteteve të të kërkuarit dhe rindërtimin e identitetit të tij. Gjatë hetimeve u konstatua se ai kishte siguruar edhe një pasaportë të re shqiptare. Kjo ndihmoi në identifikimin e të dhënave të nevojshme për të orientuar kërkimet përtej kufijve kombëtarë.

Emri i tij kishte dalë gjatë hetimit antidrogë të zhvilluar në Rimini. Ai u arrestua më 10 tetor 2012, bashkë me 10 persona të tjerë. Shqiptarit iu gjetën rreth 1 kilogram heroinë.

Më 19 shkurt 2019, Prokuroria e Riminit lëshoi ndaj tij një urdhër-arresti për ekzekutimin e dënimit. Sipas vendimit, atij i kishin mbetur për të vuajtur 6 vjet, 10 muaj e 8 ditë burg, si një gjobë prej 64.000 eurosh.

Gjurmët e tij ishin zhdukur prej 2015.