Audio-skandali, KLD shkarkon
kreun e Gjykatës së Gjirokastrës
Gjyqtari-qytetares:Bëhu imja që të fitosh gjyqin

Këshilli i Lartë i Drejtësisë ka shkarkuar me 14 vota pro dhe asnjë kundër kreun e Gjykatës së Gjirokastrës, Guximtar Boçi.

Vendimi për shkarkimin e tij erdhi pas publikimit të një audio-regjistrimi mbrëmjen e shkuar ku ai i kërkonte një qytetareje favore seksuale në këmbim të dhënies së një vendimi gjyqësor në favor të saj.

Të 14 anëtarët e KLD-së kanë votuar unanimisht, ndërkohë që mbledhja ishte njoftuar më herët nga ministri i Drejtësisë Ylli Manjani.

Ndërkaq KLD ka miratuar dhe kërkesën e ministrit të Drejtësisë Ylli Manjani dhe ka pezulluar nga detyra gjyqtarin Boçi.

Në vijim, Këshilli caktoi gjyqtaren Albina Spahën, për të ushtruar përkohësisht detyrën e kryetares së kësaj gjykate si dhe shpalli vendin vakant, duke hapur konkurrimin për pozicionin e kryetarit të kësaj gjykate.
 
Gjithashtu, Këshilli vendosi që Inspektorati i KLD-së dhe i Ministrisë së Drejtësisë të ndërmarrin bashkarisht një inspektim për verifikimin e veprimtarisë së gjyqtarit të Rrethit Gjyqësor Gjirokastër Boçi dhe të gjyqtares Blerta Çibuku për shkelje të rregullave të etikës, si dhe caktoi një anëtar të tij, për të verifikuar edhe sjelljen e inspektorit të KLD i cili ishte ngarkuar për trajtimin e ankesës së qytetarit dhe që përmendet në regjistrimet audio të bëra publike në media.

Burime nga Prokuroria e Krimeve të Rënda, shprehen se Guximtar Boçi do të hetohet për akuzën e korupsionit.

Guximtar Boçi prej tre vitesh ishte në krye të Gjykatës së Gjirokastër, ndërsa prej më shumë se 20 vitesh ka ushtruar profesionin e gjyqtarit.

(d.b/Shqiptarja.com)