/ATSH/.- Kryeministri i Kosovës, Isa Mustafa, priti sot në takim një delegacion të gjerë të Komitetit Olimpik Ndërkombëtar (KON), të udhëhequr nga kryetari i saj, Thomas Bach.
Sipas KosovaPress, Mustafa e falënderoi kryetarin Bach për kontributin e tij për pranimin e Kosovës në Komitetin Olimpik Ndërkombëtar si dhe për ndërkombëtarizimin e sportit kosovar, në përgjithësi.
Mustafa vlerësoi pranimin e Kosovës në Komitetin Olimpik Ndërkombëtar, duke theksuar se ky vendim ka rëndësi të posaçme për sportin dhe për rininë kosovare.
Ai informoi kryetarin e KON-it mbi hapat konkret që do të ndërmerren në vazhdim nga Qeveria e Kosovës, në krijimin e kushteve sa më të mira që sportistët kosovarë të arrijnë rezultate maksimale në garat sportive ndërkombëtare, ku do të marrin pjesë.
Kryetari i Komitetit Olimpik Ndërkombëtar, Thomas Bach, çmoi përkushtimin e institucioneve të Kosovës për avancimin e sportit në Kosovë, si dhe punën profesionale të Komitetit Olimpik të Kosovës në këtë drejtim.
Bach po ashtu shprehu përkrahjen e mëtejshme të Komitetit Olimpik Ndërkombëtar për avancimin e sportit në Kosovë, duke iu uruar suksese sportistëve kosovarë në garat ndërkombëtare.