Rëndohet bilanci i të vrarëve  në Bagdat i cili  mesnatën e të shtunës u godit nga dy sulme kamikaze. Të paktën 200 persona humbën jetën dhe qindra të tjerë   mbetën të plagosur. Mes të vrarëve 25 janë fëmijë.
Qeveria irakene shpalli 3 ditë zie  në nder të viktimave. I ashtuquajturi Shtet Islamik mori përsipër autorësinë e sulmit, duke thënë në një deklaratë të shpërndarë “online” se, ai ishte kryer nga një shtetas irakian.

Sulmi i parë   ishte shpërthimi i një autobombe në lagjen  Karada pranë një restoranti dhe një qendre tregtare.

Mësohet se zona ishte e mbushur plot me njerëz, që po darkonin jashtë pas perëndimit, si pjesë e riteve të muajit të Ramazanit.

Bomba e dytë shpërtheu në një zonë me banorë kryesisht shiitë në Veri të kryeqytetit Bagdad. Sulmet vijnë vetëm një javë pasi forcat e sigurisë irakiane rimorën kontrollin e qytetit të Falluxhës nga duart e Shtetit Islamik.

Shtetet e Bashkuara  në reagimin e tyre thanë  se sulmi i fundit forcon edhe më shumë mbështetjen e tyre për forcat irakiane në luftën kundër ISIS. 

Redaksia online
(e.m/Shqiptarja.com)