Balla: Dënimi i Tafajt, arsyeja pse
Saliu ishte sot shumë i shqetësuar 

Deputeti socialist, Taulant Balla, shkruan në Facebook se kërkesa e Prokurorisë për të dënuar me 1 vit burg ish ministrin Myqerem Tafaj, ishte arsyeja pse deputetët demokratë i binin tavolinave të Kuvendit dhe pse Berisha ishte i shqetësuar. Deputeti socialist akuzon ish kryeministrin dhe dy ministrat e tij të Arsimit, Genc Pollo e Myqerem Tafaj se licencuan universitete private të cilat jepnin diploma pa vlerë.
 
Postimi i plotë në Facebook i Taulant Ballës
 
"Ja pse Saliu ishte sot shumë i shqetësuar. Ja pse urdhëroi deputetët e tij t'i binin foltores dhe tavolinave. Ja pse Saliu ka mbledhur tani me urgjencë Grupin te SHQUPI.
Sot Prokuroria e gjeti fajtor Ministrin e Arsimit të qeverisë së vjetër të Sali Berishës për mashtrimin e 1869 studentëve, duke i shkaktuar familjeve të tyre një dëm prej 1 milionë Eurosh. Prokuroria kërkon 1 vit burg për këtë ish-ministër të Sali Berishës.

Sali Berisha me Myqerem Tafajn dhe me pare me Genc Pollon licencuan vitrinat dhe kristalinat, duke e çuar arsimin e larte në pikën ku kishte kontrata të tipit: “Dhuron një makinë dhe fiton një bursë trevjeçare universitare”, “Dhuron 800 litra naftë, kontratë e hapur për tre vite dhe përfiton katër bursa studimi trevjeçare ose shërbime të tjera”, “Dhuron 17 kompjuterë dhe përfiton 6 bursa studimi trevjeçare”, “Dhuron punime të ndryshme në duralumin...”. Ky ishte arsimi i lartë i Qeverise se Vjeter. “Materiale të ndryshme në dru dhe përfiton katër bursa studimi”, “Dhuron dy ton tallash në këmbim të dy bursave trevjeçare për titull shkencor. Dhuron raki rrushi, mollë dhe verë dhe përfiton bursë studimi trevjeçare me të drejtë të së dytës në bazë të sasisë së rrushit, mollës dhe verës”. E kuptoni se çfarë vreshtash dhe çfarë lloj distilerish kishte vënë në lëvizje Sali, Myqeremi dhe Genci për të dhënë bursa? “Dhuron një makinë Volkswagen dhe një Chevrolet të përdorur, dhe të dy bashkë marrin nga dy bursa tre vjeçare”, “Dhuron 20 sedilje furgoni si dhe sistem të brendshëm furgoni dhe përfiton dy bursa dy vjeçare”. Ky ishte arsimi larte ne Qeverinë e Vjetër", shkruan Balla në Facebook.

Redaksia Online
Shqiptarja.com