Sekretari i Përgjithshëm i Partisë Socialiste, Taulant Balla, tha se partia ku ai bën pjesë ka standardin më të lartë të transparencës financiare në Shqipëri, bazuar në një strukturë auditivi tërësisht të pavarur dhe profesionale.

Balla e deklaroi këtë gjatë një takimi me Drejtorin për Evropën Qendrore dhe Lindore të Institutit Demokratik amerikan NDI, Robert Benjamin, dhe Drejtorin e Programeve të Partive Politike të NDI në Washington, Ivan Doherty.

Zyrtarët e lartë diskutuan ndër të tjera për bashkëpunimin e ngushtë mes PS dhe Institutit Demokratik amerikan. Parmes një njoftimi në “Facebook”, Balla tha është socialistët vlerësojnë maksimalisht asistencën dhe këshillimin e ekspertëve të NDI në përgatitjen e drejtuesve të rinj dhe në rritjen e transparencës së financimit të partive politike.

“Në cilësinë e Sekretarit të Përgjithshëm të Partisë Socialiste pata kënaqësinë të prisja në një takim Drejtorin për Europën Qendrore dhe Lindore të Institutit Demokratik amerikan NDI, zotin Robert Benjamin, dhe Drejtorin e Programeve të Partive Politike të NDI në Washington, zotin Ivan Doherty.

Partia Socialiste e Shqipërisë prej 15 vitesh ka një bashkëpunim shumë të ngushtë me Institutin Demokratik amerikan dhe ne vlerësojmë maksimalisht asistencën dhe këshillimin e ekspertëve të NDI në përgatitjen e drejtuesve të rinj dhe në rritjen e transparencës së financimit të partive politike.

Në takimin e zhvilluar me drejtuesit e lartë të Institutit Demokratik u vlerësua fakti që Partia Socialiste ka standardin më të lartë të transparencës financiare në Shqipëri, bazuar në një strukturë auditimi tërësisht të pavarur dhe profesionale. Shumë shpejt një delegacion i Partisë Socialiste do të vizitojë zyrat qendrore të Institutit Demokratik amerikan në Washington për të diskutuar dhe nënshkruar një Memorandum Bashkëpunimi mes PS dhe NDI”, shkruan Balla.

Ndërkohë, po ditën e sotme delegacioni NDI i kryesuar nga Robert Benjamin u takua dhe me kreun e Partisë Demokratike, Lulzim Basha, ku ky i fundit shprehu shqetësimin e kanabisit në vendin tonë, duke e cilësuar atë një projekt elektoral të kryeministrit Edi Rama.

d.c./shqiptarja.com