Balla ‘thumbon’ LSI: Jo më aleancë
me partitë e interesave të vogla

Drejtuesi politik i PS në qarkun e Elbasanit, Taulant Balla i shoqëruar nga Kryetari i Bashkisë u takua me banorët e Njësisë Administrative Bradashesh për të diskutuar mbi problematikat, por edhe përparësitë që çdo zonë ka për investime.
 
Balla ka thumbuar gjatë fjalës së tij LSI kur u shpreh se pas rezultatit të 25 qershorit nuk do të bëjmë më aleancë me partitë e interesave të vogla.
 
"Ne e kemi lexuar votën e 25 Qershorit si një votë KuqeZi dhe po KuqeZi do të qeverisim në këto 4 vite.
 
Tashmë jo në aleancë me partitë e interesave të vogla, por në aleancë dhe bashkëqeverisje me njerëzit e thjeshtë dhe të zakonshëm të këtij vendi.
 
Është hera e parë pas 25 vitesh, që pas përfundimit të zgjedhjeve deputeti bashkë me kryetarin e bashkisë dhe me autoritete të tjera rikthehen përsëri në takime me njerëzit, për të identifikuar prioritetet kryesore të cilat ne mendojmë se duhen adresuar” tha ai.
 
Banorët ankohen për shëndetësinë
Banorët e fshatrave të njësisë administrative Bradashesh ishin pjesë aktive e këtij takimi, duke nënvizuar të gjitha problemet e tyre dhe duke veçuar ato më imediatet duke filluar nga shëndetësia.
 
"Kanë mbetur disa rrugë lagjesh pa u asfaltuar, sepse ishte koha e Sabriut dhe ai i ndante kush është lagje socialiste dhe kush demokrate......
 
Për problemet e mjekësisë mendoj që duhet t'i kushtohet një vëmendje më e veçantë, më e mirë nga qeveria - kjo, flas, në nivel qendror.
 
E shikojmë të gjithë se çfarë hasim në shëndetësi, çfarë problemesh krijohen, duke filluar nga mungesa e ilaçeve që janë bazë për një pjesë. Pa folur këtu për gjërat e tjera: që të shkosh në ambulancë duhet të rrish 6 orë që të bësh një vizitë mjekësore apo për të marrë një shërbim që është i domosdoshëm. Duhet vënë dorë.
 
Problematika që ka shkaktuar autostrada, dhe tani me miratimin e fondit mendoj që do të realizohet.
 
Por kërkojmë këmbënguljen edhe të deputetit që ta realizojnë një sahat e më parë, sepse po marrim gjoba duke e lënë makinën në autostradë, sepse s'kemi nga ta çojmë në shtëpi" ishin disa nga shqetësimet që ngritën banorët, sipas njoftimit nga zyra e shtypit.
 

d.b/shqiptarja.com