Bankat, nuk ulen kreditë e këqija

TIRANE- Pesha e kredive me probleme mbi volumin total të kredisë bankare nuk pritet të bjerë nga niveli aktual prej 18 përqindësh, edhe pse faktorë të ndryshëm nuk bëjnë të mendosh për një rritje të shpejtë të volumeve të kredidhënies, theksojnë ekspertët e sektorit. Sipas tyre, pavarësisht nga parashikimet për rritjen ekonomike, problemet e pronësisë të përjetuara nga bankat në fazën e ekzekutimeve, si dhe vështirësitë e hasura nga klientët për përgatitjen e dokumentacionit të nevojshëm mbi kolateralet e ofruara për kreditë e reja, mosregjistrimi në hipotekë i shumë pronave etj., sjellin një ngadalësim të ndjeshëm në procesin e kredidhënies. Bizneset janë ato që përbëjnë pjesën dërmuese të volumit të portofolit të kredisë, ndaj edhe efekti është ndjerë më tepër në to. Sektori i ndërtimit ka qenë ai më problematiku, i cili ka pasur dhe peshë të rëndësishme në totalin e portofolit. Në numër janë shumë më tepër kreditë individuale ato që nuk ripaguhen dhe për të cilat ka më pak mundësi ristrukturimi. Sipas të dhënave nga Banka e Shqipërisë, gjatë 8-muajve të parë të këtij viti, kreditë me probleme kanë arritur në nivelin e 17.9%, kur në fillim të vitit ato ishin 14.4% e totalit të kredive të dhëna. Shqetësues është shtimi i kredive të humbura (mbi 365 ditë vonesë). Kjo kategori po rritet me shpejtësi, duke rezultuar në gati 5% të totalit të huave të sistemit bankar në qershor 2011, nga 3.2% në fillim të 2010-s.
(shqiptarja.com)