Banorët e Ballagatit protestojnë
për 2.5 km rrugë, PD i mbështet

Qindra banorë të fshatit Ballagat në Lushnjë kanë protestuar sot, pasi sipas tyre rruga që i lidh ata me qytetin është jashtë çdo standardi dhe asnjë nga institucionet shtetërore nuk kanë ndërhyrë për përmirësimin e infrastrukturës.

Banorët janë shprehur se, rikonstruksioni i rrugës ka nisur që në vitin 2013, por investimi është ndërprerë, pasi sipas tyre zona voton djathtas dhe shteti nuk interesohet për ta. 

“Ne si popull këtu jemi të diskriminuar totalisht. Vuajmë për një copë rrugë, për ujin dhe dritat. Taksat janë shumë të larta. Ku shkojnë lekët kur ne taguajmë?! Ne kemi kaq shumë sera dhe rruga na duhet. Por më e keqja është se me ndodh një urgjencë nuk e çon dot fëmijën në spital”, u shpreh një prej banorëve.

“Ne i kemi bërë serat dhe këta na premtuan subvencionime. Por subvencionime nuk ka dhe ne nuk po na shitet malli. Problem kryesor është rruga sepse nuk e çojmë dot në treg. Plus që një kile kastravec është 200 lekë tani në mars. Kjo është turp. Plehrat i paguajmë shtrenjtë dhe naftën po ashtu. Jemi shumë keq”, tha një fermer.
 
Në mbështetje të banorëve ishin edhe përfaqësues të Partisë Demokratike, Sekretari për Aksionin Qytetar, Ervin Salianji dhe kryetari i PD-së së Lushnjës, Myslym Murrizi.

“Jam sot mes banorëve të Ballagatit si kryetar i PD-së rrethit, në mbështetje të kërkesës së tyre të drejtë dhe legjitime për një rrugë 2.5 kilometra, e cila u tenderua dhe filloi faza e parë në qershor të 2013 por pas fitores së aleancës së majtë, nuk u lëvrua as pjesa e parë e kontratës. Bëhej fjalë për 500 milionë lekë. Shoh një hakmarrje të verbër të qeverisë ndaj votimeve që u bënë në 2013. Këta banorë merren me bujqësi dhe kanë rreth 30% të serave në të gjithë Shqipërinë. Nuk janë subvencionuar dhe çmimi është katastrofë sepse eksporti është mbyllur për shkak të 1001 arsyeve të kësaj qeverie. Tregu është për të ardhur keq dhe me aq lekë këta nuk nxjerrin as shpenzimet që hedhin në tokë dhe jo më të fitojnë për të mbajtur familjen. Sot në opozitë dhe nesër në pushtet do të jemi absolutisht në krah të interesave të qytetarëve pavarësisht bindjeve apo se për kë do votojnë ata”, tha Murrizi.

“Jemi sot këtu jo vetëm për të ngritur shqetësimin e banorëve të zonës dhe për të qënë në çdo cep të Shqipërisë aty ku janë problemet, por dhe për të treguar publikisht që Partia Demokratike dhe kryetari i saj Basha është një model dhe Rama është një model tjetër. Modeli i Ramës është njohja e Shqipërisë nga Kryeministria në Surrel ndërsa modeli i Lulzim Bashës është dëgjimi i qytetarëve, qendrimi pranë halleve të tyre, dhënia e alternativës, ngritja e zërit dhe dhënia zë e problemeve që kanë qytetarët anembanë vendit. Mjerimi, skamja dhe arroganca me të cilën kjo qeveri trajton qytetarët duket në çdo cep të territorit të Shqipërisë. Siç e shikoni për 2 kilometra rruge, pavarësisht se kërkesa është bërë që në 2013 nga ana e ish komunës që drejtohej nga Partia Demokratike, qeveria nuk e miraton vetëm për një arsye; sepse qeveria miraton vetëm aty ku ka interesa të oligarkëve të saj dhe nuk do tia dijë për qytetarët. Siç e thanë banorët këtu dhe siç e kanë parë në të gjithë Shqipërinë, qeveria nuk sjell asnjë përfaqësues të saj për ti dëgjuar apo për të marrë shqetësimet e tyre”, tha Salianji.
 
Redaksia Online
(F.T/shqiptarja.com)