Guardia di Finanza në Bari të Italisë, së bashku me zyrtarët e Agjencisë së Doganave të Barit, kanë sekuestruar në portin e Barit një rimorkio të ngarkuar me elektroshtëpiake të përdorura që kishin destinacion final portin e Durrësit në Shqipëri.

Dokumentacioni tregtar me të cilin ishte pajisur shoferi detyrpi Agjencinë e Doganave në Bari të kryente një kontroll fizik të kujdesshëm gjatë të cilit u evidentua ngarkesa e mallrave e përbërë nga rreth treqind furra dhe makina larëse të përdorura për mbi 18 tonë peshë.

Kjo ngarkesë u inspektua me kujdes dhe u konstatua se mungonin dokumenta shoqërues malli të cilat do të vërtetonin se mallrat e sekuestruara mund të përdoreshin. Nga autoritetet mallrat u konsideruan si mbeturina dhe dërgesa e paligjshme dhe e dënueshme penalisht nga legjislacioni italian për mjedisin.

Aktiviteti i kontrollit çoi në sekuestrimin penal të mallrave në fjalë si dhe rimorkios së përdorur, për shkak të transportimit dhe administrimit të paligjshëm të mbeturinave dhe trafikimin e tyre, si dhe në procedim për përfaqësuesit ligjor të kompanisë eksportuese.