Basha: Institucionalizojmë tryezën
opozitare, prioritet dekriminalizimi

TIRANE - "Koalicioni opozitar ka marrë përsipër një detyrë shumë të vështirë, në një '97 pa plumba, në një Shqipëri të zotëruar nga krimi jashtë dhe brenda parlamentit". Kështu është shprehur kryetari i PD-së Lulzim Basha pas takimit që pati me aleatët për të organizuar qëndrimin opozitar. 

Tre kanë qenë çështjet kryesore që janë diskutuar në këtë takim dhe që do të jenë shtyllat kryesore ku do të bazohet opozita: Institucionalizimi i tryezës opozitare, unifikim për dekriminalizimin e politikës dhe propozime konkrete për zgjedhje të lira do të jenë në fokus të aksionit opozitar. 

 "Tre vendime kryesore të tryezës së opozitës dua tua komunikoj sot në emër të gjithë kryetarëve dhe përfaqësuesve të forcave opozitare.Së pari, vendimin për të institucionalizuar tryezën e opozitës duke i paraprirë kështu proceseve të rëndësishme si organizimi i zgjedhjeve të lira dhe të ndershme, dhe platformës politike që do të shpalosim para gjithë qytetarëve shqiptarë.Së dyti, unifikimin e qëndrimit për dekriminalizimin e politikës. Zbatimin e ligjit të dekriminalizimit si një domosdoshmëri urgjente për stabilitetin politik të Shqipërisë në kushtet kur personat me rekorde të tmerrshme kriminale dhe banditët e armatosur me mandat deputeti në gjirin e mazhorancës përbëjnë një rrezik të përditshëm për shëndetin dhe jetën e qytetarëve, dhe po përdoren si “azapë” për t’iu kundërvënë opozitës politike të vendit.Siç ishte rasti i djeshëm i rrahjes barbare dhe kërcënimit me jetë të kryetarit të Partisë Demokratike në Peqin nga deputeti i mazhorancës Aqif Rakipi. Siç është rasti i pardjeshëm, sulmi me armë zjarri ndaj aktivistëve të Partisë Demokratike në Ersekë nga një prej krerëve të Partisë Socialiste dhe mbajtja e fshehtë e kësaj ngjarje deri në denoncimin tonë.Siç janë rastet e panumërta të cilat kanë një fill përbashkues, Edi Ramën i cili pavarësisht prej ligjit për dekriminalizimin vazhdon të mbetet inspiruesi, frymëzuesi i dhunës politike kundër opozitës nga personat me rekorde kriminale me të cilët ka ardhur në pushtet.Aleanca e Krimit ka sot përballë një Aleancë Opozitare që vjen duke u zgjeruar dhe që e ka theksuar dhe e thekson dekriminalizimin si prioritetin numër një, prioritetin absolut të Shqipërisë dhe shqiptarëve sot. Prioritetin e gjithë prioriteteve. Të ndjekur nga prioriteti tjetër, ai i zgjedhjeve të lira dhe të ndershme. Sot opozita shqiptare, faktori opozitar i përbërë nga gjithë partitë politike të opozitës, formalisht pjesë e këtij koalicioni, të tjerë me të cilët jemi në dialog dhe bashkëpunim të vazhdueshëm dhe që presim të jenë pjesë e këtij koalicioni, rakordohen në një qëndrim të përbashkët të përbërë nga disa propozime kryesore për të siguruar zgjedhjet të lira dhe të ndershme në Shqipëri.



Për të eliminuar të gjitha premisat për kërcënimin e votuesve, për presionin dhe shantazhin e votuesve, për shit-blerjen e votës së votuesve shqiptarë, për shtrembërimin e vullnetit të tyre përmes vjedhjes së votave në procesin e numërimit. Dhe në këtë kuadër kemi dalë me propozime konkrete të cilat do t’i parashtrojmë në formatin politik të dialogut me maxhorancën formale. Si dhe procesin e financimit të fushatës dhe procesin e aksesit mediatik, elementët e aksesit mediatik të opozitës dhe të gjitha partive politike në fushatë.Ne kemi propozime konkrete të cilat sot mbajnë vulën dhe firmën e çdo partie politike pjesëtare e koalicionit opozitar. Dhe më lejoni të them edhe të partive të tjera të cilat ndihet dhe janë në opozitë me qeverisjen dhe janë në proces të afrimit të koalicionit opozitar të drejtuar nga Partia demokratike.Këto janë tre konkluzionet: Institucionalizimi i tryezës opozitare. Zbatimi i dekriminalizimit si prioritet i të gjithë prioriteteve në Shqipëri, pra dekriminalizimi i politikës.  Garantimi i një procesi të lirë, të ndershëm dhe demokratik zgjedhor, për t’i paraprirë çdo diskutimi tjetër që mund të ketë të bëjë me modelin, që të garantojë një përfaqësim sa më të denjë të votës së shqiptarëve në parlamentin e ardhshëm të shqiptarëve.” ka thënë Basha pas takimit me partitë opozitare.

Pak pas përfundimit të takimit me aleatët kreu i Partisë Republikane Fatmir Mediu u shpreh se kjo tryezë do të mblidhet në mënyrë periodike, ndërkohë që tha se marrëdhënia aktuale me parlamentin nuk duhet konsideruar si bojkot. 

"Nuk ka të bëjë me bojkot parlamenti, por qëndrim të përkohshëm për cështje që janë të rëndësishme për vetë funksionimin e parlamentit. Nuk mund të pranojmë që gjërat të funksionojnë sipas interesave tërësisht të paligjshme të mazhorancës sot", tha Mediu.