Basha-Krichbaum: PD e voton 
reformën nëse pranohet neni 88

Kryetari i Partisë Demokratike, Lulzim Basha e sheh fatin e reformës në drejtësi të lidhur ngushtësisht me zbatimin e rekomandimit 88 të Komisionit të Venecias. Gjatë një deklarate për mediat, pas takimit me kryetarin e Komisionit të Jashtëm në Bundestagun gjerman, Gunther Krichbaum, Basha tha se opozita është e gatshme t'i japë zgjidhje reformës, nëse zbatohet ky detyrim. 
 
"Nuk pranojmë një drejtësi "Venecia minus", pasi kjo kthehet në një drejtësi të kapur, në një padrejtësi për qytetarët. Sot, i bëj një thirrje mazhorancës se nëse zbatohet rekomandimi 88 i Venecias, jemi të gatshëm të gjejmë zgjidhje përfundimtare. Shqiptarët nuk meritojnë ikje nga detyrimi që ka gdhehur Venecia si për mazhorancën ashtu edhe opozitën. I bëj një thirrje m,azhorancës që të mos kapet pas alibive dhe të mos tjetërsojë detyrimin që ka për zbatimin e plotë të rekomandimit numër 88", u shpreh Basha.

Deklarata e plotë e kryetarit të PD, Lulzim Basha: 
"Në përfundim të mbledhjes javore të grupit parlamentar dua t’ju informoj edhe për një takim jashtëzakonisht pozitiv që pata më heret me kryetarin e Komisionit për Çështje Europiane në Bundestag, në parlamentin gjerman, z. Gunther Krichbaum, i cili ndodhet për një vizitë disa ditore në Tiranë në kuadër të angazhimit të Bundestagut për procesin e integrimit europian të Shqipërisë dhe ku diskutuam për sfidat e mëdha që Shqipëria ka përpara, siç janë ato të luftës kundër krimit dhe korrupsionit, stanjacioni në të cilat ka përcaktuar Shqipërinë, siç u shprehën edhe miqtë gjermanë në ditët e kaluara, siç keni raportuar edhe ju në një trajektore jo përparimi por sprapsje të standardeve që kërkohen për integrimin europian të vendit.
Edhe këtu theksi u vu tek zbatimi i ligjit, tek zbatimi i reformave, por padyshim edhe tek adoptimi i tyre, siç është rasti për reformën në drejtësi. Për të cilën u vlerësua roli i opozitës në një vit e gjysëm, roli i Partisë Demokratike, për ta futur reformën në drejtësi në binarët europianë dhe euroatlantikë të përcaktuara nga Komisioni i Venecias.
Gjeta rastin ta garantoj kryetarin e Komisionit të Çështjeve Europiane z. Krichbaum, sikundër kam bërë edhe me partnerë të tjerë në këto ditë në vijim, për gatishmërinë absolute dhe të palëkundur të opozitës, për të ofruar, kërkuar dhe pranuar çdo zgjidhje  për çështjen e fundit që ndan palët për reformën në drejtësi, që është ajo e konstituimit të katër institucioneve të reja sipas draftit final të reformës në drejtësi. Dhe për këtë kemi kërkuar zbatimin e plotë dhe tërësor të rekomandimit 88 të Komisionit të Venecias.
Nuk kemi imponuar asnjë kërkesë jashtë asaj çfarë rekomandon Opinioni Final i Komisionit të Venecias por sigurisht nuk mund të pranojmë një drejtësi “Venecia  minus”. Jo sepse ky  është një ushtrim teorik por sepse kjo do të përkthehet drejtpërdrejt në një drejtësi të kapur, të komanduar, të korruptuar, pra një padrejtësi për qytetarët.
Ndaj sot i bëj një thirrje kundërshtarëve tanë politikë, duke bërë fare të qartë se opozita nuk është tërhequr, nuk tërhiqet e nuk ka ndërmend të tërhiqet nga zbatimi i plotë i rekomandimit 88 të Komisionit të Venecias, që të ndalim luftën verbale, të ndalim insinuatat, t’i japim shqiptarëve një qartësi që e meritojnë. Unë, Partia Demokratike, opozita është për zbatimin e plotë të rekomandimit 88 të Komisionit të Venecias.
Nëse edhe z.Rama është për zbatimin e plotë të rekomandimit 88 të Komisionit të Venecias jemi gati të ulemi të gjejmë, sigurisht përmes instrumentave që ekzistojnë, Komisionin Ad Hoc apo instrumenteve të tjera, zgjidhjen përfundimtare këtij problemi.
Shqiptarët nuk meritojnë akuza, nuk meritojnë provokime, nuk meritojnë ikje nga detyrimi që ka gdhendur Opinioni i i Venecias si për mazhorancën ashtu edhe për opozitën, por në veçanti për mazhorancën që ka përgjegjësi për këtë reformë duke qenë mazhorancë.
Ndaj në vend që t’i ikim rekomandimit 88, i bëj një thirrje dhe një ftesë mazhorancës të mos kapet pas alibive, të mos kapet pas fijeve të kashtës. Asgjë nuk e zbeh, as nuk e tjetërson detyrimin që ka për zbatimin e plotë dhe total të rekomandimit 88.
Unë dhe Partia Demokratike jemi të gatshëm që të angazhohemi në çdo çast për t’i dhënë shqiptarëve drejtësinë e pakapur politikisht që është e vetmja drejtësi e reformuar".

• Share