Basha: Me kundërshtarin politik
për zgjedhje të lira e "drejtësi"

Realizimi i zgjedhjeve të lira dhe i një reforme të plotë për drejtësinë do të jenë dy çështjet që do të shtrohen në tryezën e dialogut politik Rama-Basha. Duke folur me të rinjtë në Lezhë, kreu i PD-së tha se do të bëjë përpjekjet maksimale për t’i arritur këto standarde.

 “Unë jam europianist, dhe si i tillë nuk mund të mos përpiqem me gjithçka për t’i dhënë shqiptarëve zgjedhje të lira dhe të ndershme, një drejtësi që nuk i mbron por i ndëshkon qeveritarët e korruptuar dhe kriminelët. Dhe do të përpiqem patjetër të gjej gjuhën e përbashkët me kundërshtarin politik, por vetëm sipas standardeve europiane: Për zgjedhje të lira dhe të ndershme, zgjedhje elektronike, numërim elektronik, dhe një drejtësi të pakapur nga Koço Kokëdhima, nga Emiliano Shullazi, nga Habilajt”.
 
Kryetari i Partisë Demokratike, Lulzim Basha ka vënë votën e lirë në themel të vendimmarrjes dhe zgjedhjet në Partinë Demokratike pasi beson se përmes votës është mënyra më e mirë për të bërë zgjedhjet dhe zgjidhjet e duhura. Me votë u zgjodhën drejtuesit e Forumit Rinor, me votë të përzgjidhen dhe 49 kandidatët për deputet nga radhët e të rinjve. Lulzim Basha u ka bërë dhe një premtim të rinjve nga Lezha. Sa më të mirë të jenë kandidatët aq më lart do të renditen në listën e kandidatëve.
 
“Në qoftë se kandidatët që ju do të zgjidhni me votë të lirë dhe të ndershme  sipas gjykimit tuaj e me sa më pak ndikime të jashtë, mundësisht me zero ndikime të jashtme përveç gjykimit juaj; pasi t’i dëgjoni mirë e mirë e të bindeni për integritetin e tyre, për forcën e tyre, për kurajon e tyre; Për luajalitetin e tyre në radhë të parë ndaj interesave tuaja, dhe sigurisht ndaj interesave të opozitës, Partisë Demokratike sot e të qeverisjes tonë nesër,sa më të mirë t’i zgjidhni aq më lart, ju jap fjalën, do t’i rendisim në listën fituese të deputetëve të ardhshëm të Kuvendit të Shqipërisë”.
 
Në takimet me fermerët në Rraboshtë dhe Zejmen Basha u njoh me mungesën e subvencioneve dhe investimeve në bujqësi. 150 milionë euro, theksoi kreu i demokratëve do të akordohen në buxhetin e bujqësisë që në vitin e parë të qeverisjes. 100 milionë euro do të shkojnë drejtpërdrejt për subvencione për fermerët, blegtorët dhe peshkatarët.
 
"Paratë që sot shkojnë për luks, për Vilma Nushin e që përfundojnë në xhepat e qeveritarëve janë më shumë se të mjaftueshme për të përballuar faturën e uljes së çmimit të energjisë", theksoi Basha.
 
 “Për t'ju ulur çmimin e energjisë shqiptarëve me 7.7 lekë/kë për konsumatorin dhe me 9.7 lekë /kë për biznesin na duhen rreth 60,70 milionë dollarë. Aq sa shpenzojnë këta për orendi. Ja ku janë lekët. Po t’i japim të gjitha familjeve ndihmë ekonomike 200 apo 300 kë e para falas, fatura është 20 milionë dollarë. Ndërsa këta 80 milionë dollarë shpenzojnë për zyra, perde. 20 milionë dollarë do t’i jepnin vetëm për jaguarë. 120 milionë i merr Vilma Nushi për check-up-in, 80 milionë i merr ky tjetri për sterilizimin. Ja ku janë lekët pra. Lekët e kujt marrin këta? Lekët tuaja marrin, lekët e taksave marrin që i nxjerrin me kërbaç duke i marrë shpirtin tregtarëve dhe fermerëve.
Në radhë të parë do të ulim taksat dhe vetëm me uljen e taksave ne llogarisim që ekonomisë shqiptare t’i rikthehen 1 miliard euro që sot nuk përfundojnë në arkën e shtetit, jo. Së dyti, ato para që do të mblidhen do të destinohen qartazi vetëm për investime që hapin vende pune dhe ndihmojnë standardin e jetës”, tha Basha.