Basha në 17 leje dhuroi dhe 1 kat 
shtesë, shpërbleu ortakët e "Jon"

TIRANE- Në katër vite të drejtimit të bashkisë së Tiranës ish-drejtuesi Lulzim Basha ka përdorur një teknikë të veçantë në miratimin e lejeve ndërtimore duke përdorur një hapësirë mes planit të përgjithshëm urbanistik dhe planit vendor urbanistik. Basha nëpërmjet zyrës së Urbanistikës në Bashkinë e Tiranës, ka dhënë leje, duke miratuar një kat plus, gjë e cila sipas specialistëve bie ndesh me planin e përgjithshëm Urbanistik të qytetit. Sipas burimeve të prokurorisë në total ish-kryebashkiaku ka dhënë 129 leje ndërtimi, por në 17 raste biznesmenë pranë Bashës kanë përfituar jo vetëm lejën ndërtimore por edhe një kat shtesë.

Dhurohet një kat
Nisur nga kjo situatë hetues të prokurorisë kanë marrë në shqyrtim të 17 rastet dhe se gjatë kësaj faze mësohet se janë marrë në pyetje dy specialistë të zyrës së Urbanistikës në Bashki. Ata kanë treguar se miratimi i lejeve të ndërtimit duke shtuar nga një kat më tepër të objektit, bazohet në Planin Urbanistik Vendor.