Basha përjashton ministrat e
Berishës nga turi për programin  

Luftë e ftohtë politike, për dominancë dhe karrierë, mes brezave dhe grupeve në Partinë Demokratike. Teksa na ndan edhe një vit nga zgjedhjet e ardhshme parlamentare, rivaliteti mes linjave në partinë më të madhe në opozitës, sa vjen e theksohet më tej. Një deklaratë e përsëritur e Lulzim Bashës se, në listën e kandidatëve për deputetë në 2017 do të përfshihen 39 të rinj nga FRPD, ka rritur pasigurinë për gardën e vjetër të Partisë Demokratike, sa i takon të ardhmes së saj në këtë parti dhe në Parlamentin e ardhshëm.

Mesazhi ishte i qartë, duke paralajmëruar kësisoj se, shumica aktuale e deputetëve të Partisë Demokratike nuk do të jetë në listën e kandidatëve për deputetë në zgjedhjet e 2017. Edhe pse ka një perceptim të fortë publik se Berisha do të ketë rolin e tij në hartimin e listës, Lulzim Basha i ka dhënë gardës së vjetër mesazhin e dytë, duke e përjashtuar nga fushata e prezantimit të programit të opozitës.