Basha: S'do ta mbyllim gojën,
ekstradimi i Seitit skandal i madh

Basha: S'do ta mbyllim gojën,<br />ekstradimi i Seitit skandal i madh<br>
Kreu demokrat, Lulzim Basha, është larguar nga salla e Kuvendit bashkë me përfaqësuesit e tjerë të opozitës.

Në dalje të Kuvendit, Basha tha për media se opozitës nuk do t’i mbyllet goja nga kjo kupolë krimi e droge, teksa e cilësoi ekstradimin e financierit të grupit ‘Habilaj’, Nezar Seiti, në Itali, si skandalin më të madh në këto 27 vjet histori.

“Skandali më i madh në 27 vjet histori është rrëmbimi i Nezar Seiti, që ka mbajtur shënim sa para i janë dhënë Tahirit sa për Ramën.

Autorët e mbytjes së Shqipërisë në krim e drogë. Mafia në pushtet e ekstradoi duke shkelur ligjet për të mbrojtur Tahirin, Ramën, kupolën në pushtet. Ne kërkuam fjalën në Kuvend në përputhje me rregulloren, për të kërkuar praninë e Ramës, që u fsheh, kërkoi vrimën e miut, siç u fsheh më 27 janar. Ne kërkuam praninë e Ramës për ta përballur me këtë skandal. I rëndë është bashkëpunimi i Tahirit me bandat, por më i rëndë është ky skandal.

Nuk do pranojmë kurrë të na mbyllet goja, ky nuk është më Parlament, por pengesa kryesore e avancimit të shqiptarëve në Evropë. Ju garantoj sot se opozita do të jetë në krah për të marrë në dorë fatin tonë, që sot është në duart e një bande”, tha Basha. 

Deklarata e plotë e Kryetarit të Partisë Demokratike, Lulzim Basha para Parlamentit 
Skandali më i madh në 27 vjet histori është rrëmbimi i Nezar Seitit, financieri i bandës së Habilajve. Njeriut që ka mbajtur shënim se sa para i janë dhënë Saimir Tahirit, sa për veten e tij, sa për Edi Ramën, sa për zyrtarët e tjerë të lartë të kësaj mafia, të kësaj bando-qeverie.

Dhe i cili sipas vetë pohimeve të familjarëve të tij ishte bërë gati të kthehej në bashkëpunëtor të drejtësisë, duke i dhënë kështu çështjes “Tahiri -Habilaj” një zgjidhje vendimtare duke rrëzuar çdo alibi të Ramës për mos arrestimin dhe mos vënien para drejtësisë dhe prapa hekurave të ministrit të tij shembull. Duke i dhënë Shqipërisë peshkun e parë të madh i cili do të hapë rrugën për peshqit e tjerë të mëdhenj autorët e inkriminimit të Shqipërisë, autorët e aleancës me krimin, autorët e mbytjes së Shqipërisë në drogë si pasojë e së cilës shqiptarët sot janë më të varfër, më të papunë, më të pashpresë dhe me emigracionin më të lartë sesa në 15 vitet e fundit.

Por mafia në pushtet e ekstradoi duke shkelur të gjitha ligjet me një qëllim, që t’i mbyllë gojën dhe të zvarrisë dhe të mbrojë Saimir Tahirin, për të mbrojtur Edi Ramën, për të mbrojtur kupolën mafioze në pushtet. Sot opozita në Parlament kërkoi fjalën në përputhje me rregulloren për të kërkuar praninë e Edi Ramës i cili u fsheh, siç u fsheh para bashkimit të shqiptarëve më 27 janar, kërkoi vrimën e miut për t’u fsheh opozitës siç u fsheh zërit të qytetarëve më 27 janar.

Kërkoi praninë e Edi Ramës për ta përballur pikërisht me këtë skandal më të madhin në 27 vite. E rëndë është bashkëpunimi i ish-ministrit të Brendshëm me bandat e drogës dhe përfitimi i milionave të drogës. Por shumëfish më i rëndë është ky skandal i cili vërteton se Kryeministri, Ministri i Brendshëm, Ministri i Drejtësisë, Prokuroria e Përgjithshme, Drejtoria e Ekstradimeve në Prokurori, Drejtoria e Ekstradimeve në Ministrinë e Drejtësisë, Drejtoria e Përgjithshme e Burgjeve, Interpoli, Policia e Shtetit janë bërë të gjithë bashkë në këtë komplot, në këtë konspiracion për t’i mbyllur gojën dëshmitarit kyç në momentin që ky pranoi të bëhej bashkëpunëtor i drejtësisë.

Vendi është në kthetrat e mafias. Opozita nuk do të pranojë kurrë t’i mbyllet goja. Ky nuk është më nje Parlament. Kjo është një zezanë, pengesa kryesore për drejtësi, për barazi para ligjit, pengesa kryesore për avancimin e shqiptarëve në rrugëtimin e tyre europian. Më 27 janar shqiptarët treguan se e kanë vrarë frikën dhe se e kanë vendosur të marrin fatin e tyre në duart e tyre.

I garantoj sot këtu jashtë kësaj salle dhe brenda kësaj salle se opozita do të jetë në krah dhe në ballë të kësaj përpjekje jetike për të marrë në dorë fatin tonë. I cili sot është në duart e një bande kriminale, siç e provon qartësisht super-skandali i rrëmbimit nga shteti të dëshmitarit kyç Nazer Seitaj.

d.c./shqiptarja.com

  • Sondazhi i ditës:

    Kabineti i ri qeveritar, jeni dakord me ndryshimet e bëra nga Rama?



×

Lajmi i fundit

Caktimi i datës së zgjedhjeve në Kosovë, Kurti nuk i shkon në takim Vjosa Osmanit! Presidentja: Mund ta pyesni atë, supozoj se është në zyrë

Caktimi i datës së zgjedhjeve në Kosovë, Kurti nuk i shkon në takim Vjosa Osmanit! Presidentja: Mund ta pyesni atë, supozoj se është në zyrë