TIRANE-Kryetari i PD-së, Lulzim Basha ka postuar një studim në faqen e tij në Facebook lidhur me nivelin e pagave krahasuar me rajonin, ku Shqipëria rezulton se i ka më të ulëta. Në studimin e Monitor, evidentohet se Shqipëria i ka pagat të paktën 30% më të ulëta në rajon në të gjithë sektorët.

Për këtë, lideri demokrat akuzon Edi Ramën. Këto, thotë Basha janë pasojat e taksës progresive. Ai ka premtuar se me ardhjen në pushtet do të rikthejë taksën e sheshtë.

"Sipas studimit më të fundit, me qeverinë e Ramës shqiptarët kanë mbetur të fundit në rajon edhe për pagat në sektorin publik dhe privat. Këto janë pasojat katastrofike të taksës progresive dhe një nga dështimet më të mëdha të kësaj qeverie që punon vetëm për një grusht oligarkësh.

Shqiptarët meritojnë punë dhe mirëqenie dhe ne do ti rrisim të ardhurat e tyre duke jua lehtësuar barrën e detyrimeve dhe taksave. Taksa e sheshtë prej 9% do të jetë më e ulëta në rajon prej të cilës do përfitojnë të gjithë të punësuarit dhe vetëpunësuarit në vendin tonë" shkruan Basha.