Basha takim me Lord Richard në Britani: Diskutime për luftën kundër korrupsionit, ndarjen e politikës nga krimi dhe anëtarësimi i Kosovës në KiE

Kryetari i PD-Demokratët Euroatlantikë, Lulzim Basha, ka takuar Lord Richard Keen, anëtarin e  Partisë Konservatore britanike dhe Ministër i Drejtësisë .

Me anë të një postimi në Facebook Basha thekson gjatë këtij takimi ai diskutoi me Lord Richard Keen  për luftën kundër korrupsionit në Shqipëri, ndikimin e krimit të organizuar në proceset zgjedhore dhe përparësinë e anëtarësimit të Kosovës në Këshillin e Evropës.

“Lufta kundër korrupsionit, ndarja e politikës nga krimi dhe anëtarësimi i Kosovës në Këshillin e Evropës, ishin në qendër të diskutimit që zhvillova me Lord Richard Keen, anëtar i Partisë Konservatore, pjesë e Dhomës së Lordëve, si edhe Ministër Drejtësie në hije në Parlamentin e Mbretërisë së Bashkuar.

LEXO EDHE:
Stuhia ‘Bert’ godet Mbretërinë e Bashkuar! Konfirmohet viktima e parë

Në Shqipëri, korrupsioni mbetet një sfidë madhore, edhe pse SPAK ka bërë përparime të rëndësishme në luftën kundër tij. Korrupsioni i përhapur gjerësisht, ka ndikuar negativisht në jetesën e shqiptarëve, gjysma e të cilëve jetojnë në varfëri, dhe numri i atyre që emigrojnë është më i larti në Ballkan.

Hetimet e SPAK-ut ndaj zyrtarëve dhe deputetëve të Edi Ramës, kanë faktuar  ndërhyrjet e krimit të organizuar në proceset zgjedhore, duke deformuar vullnetin e shqiptarëve dhe si këmbim qeverisja është vënë në shërbim të organizatave kriminale”, shkruan Basha.

Më tej ai thekson se Kosova duhet të anëtarësohet sa më shpejt në Këshillin e Europës.

“Pavarësisht përpjekjeve të SPAK-ut dhe Gjykatës së Posaçme, për të hetuar dhe ndëshkuar korrupsionin, progresi nuk do të jetë i mjaftueshëm nëse nuk do të mbështetet nga një qeveri e përkushtuar, për të luftuar paligjshmërinë dhe për të siguruar qeverisje të mirë.

Në këtë takim me Lord Keen, diskutuam gjithashtu, për rolin e tij si Kryetar i Komisionit për Çështjet Ligjore dhe të Drejtat e Njeriut në Këshillin e Evropës.  Ritheksova rëndësinë që BE-ja dhe NATO, duhet t’i japin njohjes së Kosovës për stabilitetin e rajonit dhe përshpejtimin e anëtarësimit të saj në Këshillin e Evropës, si interesi më i mirë i shqiptarëve dhe serbëve që bashkëjetojnë në Kosovë”, shtoi ai.

Në fund Basha nënvizon nevojën e përdorimit të aseteve të ngrirsa ruse për rindërtimin e Ukrainës.

"Folëm gjithashtu për Ukrainën, ku theksova nevojën për të përdorur asetet e ngrira të Rusisë për të financuar rindërtimin e vendit. Rusia mban përgjegjësi për shkatërrimet e shkaktuara dhe duhet të kompensojë dëmet në përputhje me ligjin ndërkombëtar, si pjesë e raportit tim të miratuar nga Këshilli i Evropës, që synon gjithashtu parandalimin e agresioneve të ardhshme", përfundon shkrimi.

Xh.K/Shqiptarja.com

TAG:
• lulzim basha
• Lord Richard Keen
• Britani e Madhe