Basha: Ujësjellësi kalon
në varësinë time

TIRANË - Kryetari i Bashkisë së Tiranës Lulzim Basha do t`i propozojë sot Këshillit Bashkiak të Tiranës marrjen në pronësi nga Bashkia e Tiranës të aksioneve të saj të Ujësjellës - Kanalizimeve sh.a, Tiranë. Lajmi është konfirmuar në një njoftim për shtyp nga bashkia, e cila thekson kjo nismë është vazhdimësi e marrjes së përgjegjësive nga ky institucion për të përmirësuar cilësinë e jetës së qytetarëve.

SHPËRNDARJA E MILIONAVE TË RAMËS
Në mbledhjen e sotme, Këshilli Bashkiak do të vendosë edhe për rreth 357 milionë lekësh,të cilat sikundër bëri me dije edhe “Shqiptarja.com” në numrin e pak ditëve më parë u zbuluan se nuk ishin përdorur nga administrata e Bashës. Fondi i trashëguar nga viti 2011, do të alokohet 56% për investime dhe 37% për shpenzime korente, në programet kryesore të zhvillimit të qytetit, ndërsa 7% e këtij fondi do të jetë transfertë për Njësitë Bashkiake

KLUBI TIRANA
Në mbledhjen e radhës së Këshillit Bashkiak, do të shqyrtohet propozimi i Kryetarit të Bashkisë për zmadhimin e kapitalit të Klubit të Futbollit "Tirana sh.a". Ky vendim parashikon dhënien e një shume prej 80 milionë lekësh Klubit të Tiranës, i cili do të përdoret për nevojat e klubit, si për përmirësimin e infrastrukturës, ndërtimin e Akademisë, përmirësimin e kushteve të stërvitjes, rinovimin e bazës materiale e nevoja të tjera të adresuara nga drejtuesit e Klubit të Futbollit të "Tiranës".

SHTËPIA E PËRBASHKËT
Këshilli Bashkiak do të shqyrtojë në mbledhjen e sotme edhe propozimin: "Për krijimin e Qendrës Sociale "Shtëpia e Përbashkët". Kjo Qendër ndodhet në territorin e Njësisë Bashkiake numër 11 në Laprakë. Në këtë Qendër do u ofrohen shërbime të ndryshme kategorive në nevojë, si informim, këshillim, asistencë ligjore, etj.

NDERIM PËR KADRI ROSHIN
Kryetari i Bashkisë Lulzim Basha do t`i paraqesë Këshillit propozimin për vendosjen e pllakës përkujtimore, në banesën ku ka jetuar Artisti i Popullit ("Nder i Kombit") Kadri Roshi, konsideruar si legjendë e skenës dhe ekranit shqiptar.
(aq/sg/shqiptarja.com)