Bashkëpunim shqiptaro-turk, shkatërrohet një grup trafiku droge! Ndalohen 4 turq, një në arrest! Në kërkim 2 shqiptarë

1 turk në pranga, 3 të ndaluar  dhe 2 shqiptarë në kërkim ka qenë bilanci i kapur nga policia turke në kuadër të operacionit për trafikim droge. Grupi kriminal turko-shqiptar u shpërbë nga policia turke në bashkëpunim me autoritet vendase.

Në Manisa të Turqisë janë sekuestruar 3 armë zjarri pistoleta, municion luftarak, 8.6 kg marijuanë, 9 pako me drogë sintetike dhe 211 bimë narkotike të kultivuara.

Policia e Shtetit siguroi informacion se në Manisa të Turqisë, disa persona ushtronin veprimtari kriminale në fushën e kultivimit, prodhimit dhe shpërndarjes së lëndëve narkotike. Informacioni i siguruar nga Policia shqiptare i është përcjellë menjëherë homologëve turq, të cilët organizuan dhe finalizuan operacionin policor të koduar “Përtej kufijve”.

Në kuadër të operacionit, u bë e mundur që në Manisa të Turqisë, të evidentohej vendi ku ishin kultivuar bimët narkotike.  Në vijim të veprimeve u arrestua në flagrancë 1 shtetas turk dhe u proceduan penalisht 3 shtetas të tjerë turq.

Po në vijim të operacionit u shpallën në kërkim, për veprën penale “Trafikimi i stimulantëve dhe lëndëve narkotike”, 2 shqiptarë dhe 1 turk, pasi janë të implikuar në këtë veprimtari kriminale.

Policia e Shtetit është e vendosur që bashkërisht me partnerët të luftojë me profesionalizëm krimin e  organizuar, duke zhvilluar hetime dhe operacione të përbashkëta, brenda dhe jashtë kufijve". njofton policia. 

K.T./G.MO/Shqiptarja.com

TAG:
• trafik droge
• turqi