TIRANE - Ish-kryeministri socialist Bashkim Fino, i cili u vendos në krye të qeverisë së Pajtimit Kombëtar nga 11 mars 1997-24 korrik 1997, ka reaguar për bojkotin e ceremonisë së djeshme në lidhje me nderimin që kryeparlamentarja Jozefina Topalli bëri ndaj tij dhe gjashtë ish-kryeminsitrave që qeverisën vendin në 20 vitet e fundit.

Në një prononcim për televizionin A1Report, Fino akuzon Topallin se ka shkelur Kushtetutën duke marrë kompetenca që nuk i takojnë.

Sipas ish-kryeministrit socialist, dekoratat i jep vetëm Presidenti i republikës. “Topalli të mos marrë kompetenca e kreut të shtetit”, -u shpreh për televizionin A1Report, Bashkim Fino.

Duke iu referuar mungesës së tij në ceremoninë e zhvilluar dje në ambientet e kryesisë së Kuvendit, Fino u shpreh se nuk donte të merrte pjesë “në një ceremoni false”.

Pasditen e djeshme, kryeparlamentarja Jozefina Topalli zhvilloi një ceremoni në kuadër të 100-vjetorit të shpalljes së Pavarësisë, mes së cilës nderoi figurat e shtatë ish kryeministrave shqiptarë që udhëhoqën vendin në 20 vitet e fundit, por edhe figura të njohura të cilat dhanë kontributin e tyre në politikën e vendit, por jo vetëm, edhe në Kosovë. U vlerësuan prej saj figura e Azem Hajdarit, Ibrahim Rugovës, Adem Jasharit, por edhe ish-kryeministrat Fatos nano, Ylli Bufi, Vilson Ahmeti, Aleksandër Meksi, Pjetër Arbnori, Ilir Meta, Bashkim Fino e Pandeli Majko.

Meksi, Majko dhe Fino bojkotuan ceremoninë e djeshme duke mos qenë të pranishëm, ndërsa gjatë momentit që kryeparlamentarja do i dhuronte Botimin me Aktet e Themelimit të Shtetit 3 ish-kryeministrave u shpreh për ta me nga një batutë. “Çmimin do ta lëmë të zyra e grupit”, - tha Topalli duke iu referuar Majkos dhe Finos, ndërsa për Aleksandër Meksin u shpreh se do ia linte në shtëpi.

Redaksia Online
(Gre.M/Shqiptarja.com)